اداکارہ حمیرا اصغر کی موت کو قتل قرار دینے کی شکایت کی اصل حقیقت سامنے آگئی، جعلی سم کا استعمال کرتے ہوئے درخواست جمع کرائی گئی۔
تفصیلات کے مطابق کراچی کے علاقے ڈیفنس سے اداکارہ حمیرا اصغر کی لاش ملنے کے معاملے پر پیشرفت ہوئی ہے، میر پور خاص سے ماڈل حمیرا اصغر کی موت کو قتل قرار دینے کی شکایت جھوٹی نکلی، درخواست گزار نے جعلی سم کا استعمال کرتے ہوئے درخواست جمع کرائی تھی۔
پولیس حکام کا کہنا ہے کہ جس نمبر سے درخواست جمع کرائی وہ جعل سازی سے جاری کیا، نمبر ایک عمر رسیدہ دیہاتی ہندو خاتون گومی کے نام پر ہے، دیہاتی خاتون گومی رائمال اوراہل خانہ اپنا نمبر رجسٹرڈ نہ ہونے سے لاعلم ہیں، متعلقہ شناختی کارڈ نمبر گومی کسی قسم کی شکایت سے بھی لاعلم ہے۔
پولیس حکام نے مزید کہا کہ پولیس لگائے گئے الزامات پر مزید تفتیش جاری رکھے ہوئے ہے تاحال الزامات سے متعلق کوئی ایسا ثبوت نہ مل سکا۔
پولیس حکام کے مطابق ڈاکٹر فیملی پرالزامات کے خلاف نیشنل سائبر کرائم ایجنسی ، پیمرا ، اور پی ٹی اے جانے کا فیصلہ کیا گیا ہے۔
یاد رہے گزشتہ روز شہری شاہزیب سہیل نے واقعے کا مقدمہ درج کروانے کے لیے درخواست دائر کی تھی، درخواست میں مؤقف اختیار کیا گیا تھا کہ حمیرہ اصغر علی کی موت طبعی نہیں بلکہ اسے قتل کیا گیا ہے، پولیس نے بھی واقعہ کو تشویش ناک بتایا ہے، اس واقعہ کی وجہ سے عام لوگوں میں تشویش پائی جاتی ہے حمیرہ اصغر علی ایک میڈیا بااثر خاتون تھی وقوعہ کی ویڈیو دیکھ کر ایسا معلوم ہوتا ہے جیسا انکا قتل کیا گیا ہو۔
درخواست کے مطابق اداکارہ کے خاندان کا ان کے ساتھ قطع تعلق ہونے بھی حیرت میں مبتلا کرتا ہے عدالت سے استدعا ہے کہ مقدمہ میں انکے خاندان کو بھی نامزد کرکے تحقیقات کروائی جائیں اور قانونی طور پر جو بھی ممکنہ کوشش کی جاسکتی ہے عدالت کی جانب سے کی جائے۔