وفاقی وزیرداخلہ محسن نقوی نے ایران کے سرکاری دورے کے پہلے روز ایرانی ہم منصب سے ملاقات کی اور دوطرفہ تعلقات پر تبادلہ خیال کیا گیا جبکہ تہران میں زائرین، سرحد کے مسائل اور دیگر معاملات پر سہ ملکی کانفرنس ہوگی۔
تفصیلات کے مطابق اتوار کے روز وفاقی وزیرداخلہ سرکاری دورے پر ایران کے دارالحکومت پہنچے، جہاں امام خمینی انٹرنیشنل ایئرپورٹ پر ایرانی وزیر داخلہ اسکندر مومنی نے پاکستانی ہم منصب کا پرتپاک استقبال کیا۔ اس موقع پر ایران کی وزارت داخلہ کے اعلی حکام، ایران میں پاکستان کے سفیر محمد مدثر ٹیپو، قونصلر آفتاب بٹ اور سفارتی افسران بھی موجود تھے۔
وفاقی وزیرداخلہ محسن نقوی نے تہران میں ایرانی ہم منصب اسکندر مومنی سے ملاقات کی، جس میں باہمی دلچسپی کے امور اور پاک ایران تعلقات پر تبادلہ خیال کیا گیا۔
ایران کے وزیرداخلہ نے کہا کہ اپنے بھائی کو ایران آمد پر دل کی اتھاہ گہرائیوں سے خوش آمدید کہتے ہیں، یقیناً آپ کا دورہ پاک ایران تعلقات کے فروغ میں معاون ثابت ہو گا۔
اس موقع پر محسن نقوی نے کہا کہ ایران ہمارا برادر ہمسایہ ملک ہے، دوطرفہ تعلقات کو خصوصی اہمیت دیتے ہیں، امید ہے کہ پاکستان، ایران اور عراق سہ ملکی کانفرنس سے زائرین کے مسائل حل کرنے میں مدد ملے گی۔
وزیر داخلہ محسن نقوی نے ایران کے سپریم لیڈر آیت اللہ خامنہ ای اور صدر مسعود پزشکیان کے لیے نیک خواہشات کا اظہار کیا۔
وفاقی وزیرداخلہ محسن نقوی کل تہران میں انتہائی مصروف دن گزاریں گے اور تہران میں زائرین اور سرحدی مسائل منعقد ہونے والی سہ ملکی کانفرنس میں شرکت کریں گے، کانفرنس میں ایران اور عراق کے وزرائے داخلہ بھی شریک ہوں گے۔
تہران میں زائرین، بارڈر اور دیگر متعلقہ مسائل کے حل کے لیے پاکستان کی درخواست پر سہ ملکی کانفرنس کا انعقاد ہو رہا ہے۔
وفاقی وزیرداخلہ محسن نقوی اس دورے میں ایران کے صدر مسعود پزشکیان سے بھی ملاقات کریں گے۔