اقوام متحدہ کے سیکرٹری جنرل انتونیو گوتریس اور وزیرخارجہ اسحاق ڈار کے درمیان ٹیلی فونک رابطہ ہوا، جس میں پاکستان کی سیکیورٹی کونسل کی مدت صدارت پر گفتگو کی گئی جبکہ اور نائب وزیرخارجہ نے سلامتی کونسل کی صدارت کے دوران تنازعات کے حل کے لیے پاکستان کے عزم کا اعادہ کیا۔
وزارت خارجہ کے مطابق اقوام متحدہ کے سیکرٹری جنرل انتونیو گوتریس کی جانب سے نائب وزیراعظم و وزیرخارجہ اسحاق ڈار کو ٹیلی فونک کال موصول ہوئی کیونکہ جولائی کے مہینے میں پاکستان اقوام متحدہ کی سلامتی کونسل کی صدارت کر رہا ہے۔
دوران گفتگو وزیر خارجہ اسحاق ڈار نے بین الاقوامی امن و سلامتی اور تنازعات کے پُرامن حل کے لیے پاکستان کے پختہ عزم کا اعادہ کیا۔
اقوام متحدہ کے سیکریٹری جنرل انتونیو گوتریس سے گفتگو کے دوران اسحاق ڈار نے پاکستان کی اقوام متحدہ کی سلامتی کونسل کی صدارت کے دوران پروگراموں اور کردار پر روشنی ڈالتے ہوئے کہا کہ پاکستان سلامتی کونسل کے صدر کی حیثیت سے تنازعات کے پرامن حل کے لیے فعال کردار ادا کرے گا۔
دونوں رہنماؤں نے آئندہ ہفتے نیویارک میں اقوام متحدہ کی سلامتی کونسل کی پاکستان کی صدارت سے متعلق سرگرمیوں کے دوران ملاقات اور تعاون پر اتفاق کیا۔
نائب وزیراعظم و وزیر خارجہ اسحاق ڈار نے اقوام متحدہ اور اس کے عملے کی ذمہ داریوں کی مؤثر ادائیگی کے لیے پاکستان کی مسلسل معاونت کا بھی اعادہ کیا۔