پاکستان کرکٹ ٹیم کے نوجوان وکٹ کیپر بلے باز حسیب اللہ خان نے پاکستان چھوڑ کر انگلینڈ منتقل ہونے کی افواہوں کی تردید کردی۔
گزشتہ کئی دنوں سے سوشل میڈیا پر پاکستان سپر لیگ (پی ایس ایل) کے دسویں ایڈیشن میں کوئٹہ گلیڈی ایٹرز کی نمائندگی کرنے والے نوجوان وکٹ کیپر بلے باز حسیب اللہ سے متعلق افواہیں گردش کررہی تھیں کہ وہ انگلینڈ منتقل ہوگئے ہیں۔
تاہم 22 سالہ نوجوان کرکٹر نے اس حوالے سے اپنے انسٹاگرام اکاؤنٹ پر ایک اسٹوری شیئر کی ہے، جس میں انہوں نے ان سب رپورٹس اور دعوؤں کو بے بنیاد قرار دیا۔
اپنی پوسٹ میں حسیب اللہ نے لکھا میں آپ سب کو مطلع کرنا چاہتا ہوں کہ میں اپنے ڈومیسٹک کاؤنٹی کنٹریکٹ اور دیگر ذمہ داریوں کے سلسلے میں انگلینڈ پہنچا ہوں، میں پوری لگن اور جذبے کے ساتھ اپنے ملک پاکستان کی نمائندگی کرنے کے لیے پرعزم ہوں۔
قومی کرکٹر نے مداحوں سے کسی قسم کی افواہوں پر یقین نہ کرنے کا کہا اور لکھا کہ میری ہر کسی سے درخواست ہے کہ غلط خبروں اور افواہوں پر دھیان نہ دیں، پاکستان زندہ باد۔
واضح رہے کہ اس سے قبل فیس بک پر ایک پوسٹ وائرل ہوئی تھی جس میں دعویٰ کیا گیا تھا کہ حسیب اللہ نے انگلینڈ کرکٹ بورڈ (ای سی بی) کے ایجنٹوں سے ملاقات کی تھی جس میں انگلینڈ میں ان کے کرکٹ کے مستقبل کے حوالے سے بات چیت کی گئی۔
یہاں یہ بات قابل ذکر ہے کہ حسیب اللہ نے 3 ٹی ٹوئنٹی میچوں میں پاکستان کی نمائندگی کی اور 12 کی اوسط سے 36 رنز بنائے۔
وکٹ کیپر بلے باز پاکستان سپر لیگ کے 10ویں ایڈیشن کے لیے کوئٹہ گلیڈی ایٹرز کا حصہ تھے لیکن انہوں نے ایک ہی میچ کھیلا تھا جس میں وہ سات رنز بناسکے تھے۔