کے پی حکومت مفت میں نہیں ملی، دفاع کرنا جانتے ہیں، جنید اکبر

صدر تحریک انصاف خیبرپختونخوا جنید اکبر نے آج نیوز کے پروگرام ”نیوز انسائیٹ ود عامر ضیاء“ میں گفتگو کرتے ہوئے پارٹی کی موجودہ صورتحال، قیادت کے فیصلوں اور سینیٹ انتخابات سے متعلق اہم نکات پر روشنی ڈالی۔

صدر تحریک انصاف خیبرپختونخوا جنید اکبر نے آج نیوز کے پروگرام ”نیوز انسائیٹ وِد عامر ضیا“ میں گفتگو کرتے ہوئے کہا ہے کہ 9 مئی کے بعد پارٹی جتنی کمزور سمجھی گئی، آج اتنی ہی مضبوط ہو چکی ہے۔ ان کا کہنا تھا کہ کے پی کی حکومت ہمیں مفت میں نہیں ملی، ہم اپنے فیصلوں اور بیانیے کا دفاع کرنا جانتے ہیں۔

انھوں نے واضح کیا کہ ضروری نہیں کہ وزیراعلیٰ کی ہر بات کو من و عن لیا جائے، تقریر کے دوران بعض اوقات الفاظ آگے پیچھے ہو جاتے ہیں۔ انہوں نے کہا کہ ”مائنس گنڈاپور“ صرف مولانا صاحب کی رائے ہو سکتی ہے، لیکن پی ٹی آئی کے پاس اپنا مضبوط فیصلہ سازی کا نظام ہے۔

صدر پی ٹی آئی خیبرپختونخوا کا کہنا تھا کہ پارٹی میں پہلے عمران خان کی بات مانی جاتی ہے، اس کے بعد بیرسٹر گوہر، سلمان اکرم راجہ اور عمر ایوب جیسے قائدین کی مشاورت کو اہمیت دی جاتی ہے۔ فواد چوہدری کی رائے کا احترام ہے لیکن فیصلے پارٹی قیادت ہی کرے گی۔

جنید اکبر نے تسلیم کیا کہ پارٹی میں اختلافات ضرور ہیں، لیکن تحریک انصاف کمزور نہیں ہو گی۔ ”ہم سیاسی ورکر ہیں، کسی کے نوکر نہیں کہ بریانی پر آنکھ بند کر کے چل دیں۔“ انھوں نے مزید کہا کہ سینیٹ کے لیے 4 سے 5 امیدواروں کے نام زیرغور ہیں، جن میں سے حتمی نام عمران خان خود فائنل کریں گے۔