راولپنڈی پمز اسپتال کے میڈیکل بورڈ نے اڈیالہ جیل راولپنڈی میں نور مقدم قتل کیس میں سزائے موت پانے والے مجرم ظاہر جعفر کا طبی اور نفسیاتی معائنہ کیا، رپورٹ رحم کی اپیل کے ساتھ صدر مملکت کو ارسال کی جائے گی۔
تفصیلات کے مطابق راولپنڈی پمز اسپتال کے میڈیکل بورڈ نے اڈیالہ جیل میں قید مجرم ظاہر جعفر کا طبی معائنہ کیا، مجرم ظاہر جعفر کا میڈیکل اور نفسیاتی طبی معائنہ کیا گیا۔
راولپنڈی پمز اسپتال کے 2 ڈاکٹرز پر مشتمل میڈیکل بورڈ تقریبا 3 گھنٹے تک اڈیالہ جیل موجود رہا، میڈیکل بورڈ پمز اسپتال کے ماہر نفسیات ڈاکٹر شفقت نواز اور نیورولوجی ڈیپارٹمنٹ کے ڈاکٹر عامر نوید پر مشتمل تھا۔
ذرائع کے مطابق میڈیکل بورڈ اپنی کانفیڈینشل رپورٹ جیل انتظامیہ کو بھجوائے گا، جیل انتظامیہ میڈیکل بورڈ کے ساتھ کانفیڈینشل رپورٹ صدر مملکت کو مجرم کی رحم کی اپیل کے ساتھ بھجوائے گی۔
میڈیکل بورڈ سپرنٹنڈنٹ سینٹرل جیل راولپنڈی کی جانب سے لکھے گئے خط پر بنایا گیا تھا، میڈیکل بورڈ کی رپورٹ سزائے موت کے مجرم کی صدر مملکت کے روبرو رحم کی اپیل سے قبل لازمی قانونی تقاضا ہے۔
واضح رہے کہ ظاہر جعفر کی سزائے موت کے خلاف اپیل سپریم کورٹ پہلے ہی مسترد کر چکی ہے۔