صدر مملکت آصف علی زرداری کی 70ویں سالگرہ کے موقع پر لاہور کے مقامی ہوٹل میں ایک پروقار تقریب کا انعقاد کیا گیا ہے، جہاں مہمانوں کی آمد کا سلسلہ جاری ہے۔ تقریب میں 70 پاؤنڈ وزنی کیک کاٹا جائے گا۔
صدر زرداری کو ملک بھر سے سیاسی رہنماؤں کی جانب سے مبارکباد اور نیک تمناؤں کے پیغامات موصول ہوئے۔ وزیراعلیٰ بلوچستان میر سرفراز بگٹی نے اپنے پیغام میں کہا کہ آصف علی زرداری کی جمہوریت کیلئے دی گئی قربانیاں ناقابلِ فراموش ہیں۔ انہوں نے کہا کہ صدر زرداری نے آئین کی بالادستی، جمہوری اقدار اور مفاہمتی سیاست کا علم بلند رکھا، اور ان کی سیاسی بصیرت پاکستان کا قیمتی اثاثہ ہے۔
سندھ کے وزیر اطلاعات شرجیل انعام میمن نے آصف زرداری کو خراجِ تحسین پیش کرتے ہوئے کہا کہ وہ ہمیشہ مثبت سیاست کے علمبردار رہے اور انہیں سیاست میں ”مردِ حر“ کا لقب ملا۔ انہوں نے کہا کہ آصف زرداری نے نہ صرف 18ویں آئینی ترمیم کے ذریعے صوبائی خودمختاری دی بلکہ خیبرپختونخوا کو شناخت، بے نظیر انکم سپورٹ پروگرام کے ذریعے خواتین کو بااختیار، اور سی پیک جیسے بڑے منصوبوں کی بنیاد بھی رکھی۔
شرجیل میمن نے مزید کہا کہ آصف علی زرداری کے دور میں کوئی سیاسی قیدی نہ تھا، انہوں نے ہمیشہ مفاہمت کی سیاست کو فروغ دیا، حتیٰ کہ بی بی شہید کی المناک شہادت کے بعد ”پاکستان کھپے“ کا نعرہ لگا کر ملک کو انتشار سے بچایا۔ انہوں نے کہا کہ آصف زرداری نے 11 سال قید کاٹی مگر کبھی انتقامی سیاست کا راستہ نہ اپنایا۔ شناختی کارڈ کی کمپیوٹرائزیشن جیسی ڈیجیٹل اصلاحات ان کے ویژن کی علامت ہیں۔
شرجیل انعام میمن کا کہنا تھا کہ آج پاکستان کو ایک بار پھر ایسی ہی بردبار اور بصیرت رکھنے والی قیادت کی ضرورت ہے جو اقتدار سے زیادہ جمہوریت، اور انتقام کی بجائے مفاہمت کو ترجیح دیتی ہو۔