بھارت کے شہر انڈور میں ایک ریٹائرڈ جج کے گھر چوری کی بڑی واردات پیش آئی، جس میں 3 چور صرف 4 منٹ 10 سیکنڈز میں زیورات سمیت 5 لاکھ روپے لوٹ کر فرار ہوگئے۔
بھارتی میڈیا کے مطابق چور رمیش گرگ نامی ریٹائرڈ جج کے گھر رات ساڑھے 3 بجے چوری کرنے بنگلے میں داخل ہوئے، دورانِ واردات ریٹائرڈ جج رمیش گرگ اپنے بستر پر سو رہے تھے اور ایک چور ان کے سامنے لوہے کی راڈ لیے کھڑا نگرانی کر رہا تھا جبکہ باقی دو چور الماری سے کیش اور زیورات نکالنے میں مصروف رہے۔
رپورٹ کے مطابق واردات کی فوٹیج کمرے میں نصب سی سی ٹی وی کیمرے میں قید ہوگئی۔ اس وقت گھر کے تمام افراد سو رہے تھے۔
سی سی ٹی وی فوٹیج میں چوروں کی شناخت نہیں ہوسکی کیونکہ انہوں نے اپنے چہروں کو کپڑے سے چھپایا ہوا تھا۔
گھر کا الارم سسٹم جسٹس گارگ کے بیٹے رت وِک کو اٹھانے میں ناکام رہا، جس کی وجہ سے چور بغیر پکڑے باآسانی فرار ہونے میں کامیاب ہوگئے۔
رپورٹ کے مطابق چوروں نے گھر میں داخل ہونے کے لیے کھڑکی کی جالی کاٹی، حالانکہ اس وقت باہر سیکیورٹی گارڈ موجود تھا۔ جبکہ رت وِک کی اہلیہ اور بچے دوسرے کمرے میں سوئے رہے اور چوری سے بالکل بے خبر رہے۔
چوری کی واردات کے بعد انڈور کے علاقے وجے نگر میں ہلچل مچا گئی، جہاں اہم اور بااثر شخصیات رہائش پذیر ہیں۔
ریٹائرڈ جج کے گھر کو نشانہ بنائے جانے کے بعد پولیس پر ملزمان کو جلد گرفتار کرنے کا دباؤ بڑھ گیا ہے۔
وجے نگر پولیس نے مقدمہ درج کر کے تفتیش شروع کر دی ہے۔ حکام علاقے کے سی سی ٹی وی فوٹیج کا جائزہ لے رہے ہیں تاکہ ملزمان کی شناخت کی جا سکے۔