نیشنل ڈیزاسٹر منیجمنٹ اتھارٹی (این ڈی ایم اے) نے ملک کے بیشتر علاقوں کے لیے شدید بارشوں اور سیلاب کا الرٹ جاری کردیا ہے۔

این ڈی ایم اے کے الرٹ کے مطابق پنجاب، خیبر پختونخوا اور بلوچستان کے متعدد علاقوں میں سیلابی صورت حال کا خدشہ ہے۔

این ڈی ایم اے نے بتایا ہے کہ شمالی خیبرپختونخوا میں چترال، دیر، سوات، کلام، مانسہرہ، بٹگرام، ایبٹ آباد اورہری پور میں شدید بارش متوقع ہے۔ پہاڑی علاقوں میں لینڈ سلائیڈنگ اور اچانک سیلابی صورتحال کا خدشہ ہے جبکہ وسطی خیبرپختونخوا میں مردان، صوابی، پشاور، چارسدہ، نوشہرہ، کوہاٹ، ہنگو کے شہری علاقوں میں شدید سیلابی صورتحال کا امکان ہے۔

اسی طرح جنوبی خیبرپختونخوا میں بنوں، لکی مروت، ڈی آئی خان، وزیرستان، کرم (پارہ چنار) اور باجوڑ کے نشیبی علاقوں میں سیلاب اور برساتی نالوں طغیانی کا خدشہ ہے۔

این ڈی ایم اے کے مطابق اسلام آباد اور شمالی پنجاب بشمول راولپنڈی، اٹک، جہلم، چکوال، تلہ گنگ میں ممکنہ شدید بارش کے باعث شہری اور نشیبی علاقوں میں سیلاب کا خدشہ ہے۔ وسطی پنجاب میں میانوالی، خوشاب، سرگودھا شدید بارش اور تیز ہوائیں متوقع ہے جبکہ وسطی پنجاب میں فیصل آباد، منڈی بہاؤالدین، گجرات کے شہری علاقوں میں سیلاب، ندی نالوں میں طغیانی متوقع ہے۔

الرٹ کے مطابق شمال مشرقی پنجاب میں گوجرانوالہ، سیالکوٹ، حافظ آباد، نارووال میں موسلادھار بارش، سیلابی صورتحال کا خدشہ ہے جبکہ پنجاب میں لاہور، قصور، اوکاڑہ میں متوقع شدید تیز بارش کے باعث شہری علاقوں میں سیلابی صورتحال کا خدشہ ہے۔

دریائے جہلم کے بالائی علاقوں بشمول جہلم، پونچھ، مظفرآباد اور کانچی میں شدید بارشیں متوقع ہیں شدید بارشوں کے باعث دریائے راوی اور ستلج میں سیلابی صورتحال متوقع جبکہ ملحقہ ندی نالوں میں بھی طغیانی کا خدشہ ہے۔

این ڈی ایم اے کے مطابق شمالی بلوچستان کے اضلاع کوئٹہ، ژوب، زیارت، لورالائی، قلات، نوشکی، برکھان، سبی، ڈیرہ بگٹی، سوئی، خاران میں وقفے وقفے سے بارش، شہری علاقوں میں سیلاب کا امکان ہے جبکہ جنوبی بلوچستان کے اضلاع بشمول خضدار، آواران، واشک، تربت، ہنگول، اورماڑہ، گڈانی میں شدیدبارش کا امکان پہاڑی ندی نالوں میں اچانک سیلابی صورتحال کا خدشہ ہے۔

ایں ڈی ایم اے نے متنبہ کیا ہے کہ شہری غیر ضروری سفر سے گریز کریں اور موسمی حالات سے آگاہ رہیں، گاڑیاں محفوظ جگہ پر پارک کریں، درختوں/ سائن بورڈز اور کمزور تعمیرات سے دور رہیں، برساتی نالوں، دریا کناروں اور لینڈ سلائیڈنگ کے حوالے سے حساس علاقوں کے سفر سے اجتناب کریں۔

الرٹ میں بتایا گیا ہے کہ مقامی انتظامیہ اور این ڈی ایم اے کی ہدایات پر فوری عمل کریں، این ڈی ایم اے تمام متعلقہ اداروں کو ممکنہ خطرات کے حوالے سے بروقت آگاہی فراہم کر ررہا ہے۔

این ڈی ایم اے کی جانب سے تمام متعلقہ اداروں کو ممکنہ خطرات سے نمٹنے کے لیے پیشگی اقدامات اور تیاری کی ہدایت جاری کردی گئی ہیں اور شہری ممکنہ سیلابی صورت حال کے پیش نظر حساس علاقوں میں غیرضروری سفر سے گریز کریں۔

الرٹ کے ذریعے این ڈی ایم اے کی جانب سے ہدایت کی گئی ہے کہ تیز بہاؤ کی صورت میں ندی نالوں، پلوں اور پانی میں ڈوبی سڑکوں سے گزرنے سے گریز کریں، مقامی انتظامیہ اور متعلقہ ادارے نشیبی علاقوں سے فوری نکاسی آب کے لیے ضروری مشینری اور پمپس تیار رکھیں۔

سیلاب متاثرہ علاقوں میں صارفین کے لیے مفت واٹس ایپ کالز کی سہولت

سیلاب متاثرہ علاقوں میں سیلولر کمپنیزاورپی ٹی اے نے صارفین کے لیے مفت واٹس ایپ کالز کی سہولت مہیا کردی ہے۔

پاکستان ٹیلی کمیونی کیشن اتھارٹی اور سیلولر موبائل آپریٹرز نے سیلاب متاثرہ عوام کے لیے خصوصی اقدامات اٹھا لیے ہیں۔

پی ٹی اے کے مطابق سیلاب زدہ علاقوں میں صارفین کے لیے مفت آن نیٹ وائس کالز کی سہولت فراہم کر دی گئی ہے تاکہ متاثرین اپنے اہلِ خانہ اور ایمرجنسی سروسز سے رابطے میں رہ سکیں، زیرو بیلنس صارفین بھی اس سہولت سے مستفید ہوں گے۔

ترجمان کے مطابق سیلاب سے متاثرہ 72 فیصد ٹیلی کام سائٹس بحال کردی گئی ہیں جبکہ باقی سائٹس کی بحالی کے لیے پی ٹی اے اور سی ایم اوز کی ٹیمیں مسلسل کوشاں ہیں۔

ترجمان کا مزید کہنا ہے کہ متاثرہ علاقوں میں ٹیلی کام خدمات کی مسلسل نگرانی جاری ہے تاکہ عوام کو بلاتعطل سہولت فراہم کی جاسکے۔