بھارتی پنجابی فلموں کے مقبول ترین کامیڈین اور اداکار جسوندر سنگھ بھالا 65 سال کی عمر میں جمعہ کی صبح برین اسٹروک کے باعث چل بسے۔
بھارتی میڈیا رپورٹس کے مطابق اداکار کے اہلِ خانہ نے ان کی موت کی تصدیق کرتے ہوئے بتایا کہ انہیں برین اسٹروک کے بعد موہالی کے فورٹیس اسپتال میں داخل کرایا گیا تھا جہاں وہ جمعے کی صبح زندگی کی بازی ہار گئے۔
جسوندر سنگھ بھالا کی آخری رسومات 23 اگست بروز ہفتہ دوپہر 12 بجے موہالی کے بالونگی کریمیشن گراؤنڈ میں ادا کی جائیں گی، جہاں ان کے اہل خانہ، دوستوں اور مداحوں کی بڑی تعداد شریک ہوگی۔
بھالا کے پسماندگان میں ان کی بیوی پرم دیپ بھالا، اداکار بیٹا پکھراج بھالا اور بیٹی اشپریت کور شامل ہیں۔
بھارتی سیاسی رہنماؤں اور فلم انڈسٹری کی شخصیات نے جسوندر سنگھ بھالا کے انتقال پر گہرے دکھ کا اظہار کرتے ہوئے ان کے اہل خانہ سے تعزیت کی ہے۔ ان کی موت سے پنجابی فلم انڈسٹری ایک بڑے فنکار سے محروم ہو گئی ہے جنہوں نے کامیڈی کے شعبے میں اپنا الگ مقام بنایا۔
یاد رہے کہ جسوندر سنگھ بھلا نے اپنے کیریئر کا آغاز 1988 میں کامیڈی البم ’چھنکاتا 88‘ سے کیا تھا۔ انہوں نے کئی مشہور پنجابی فلموں میں لازوال کردار نبھائے، جن میں ’کیری آن جٹا‘، ’بھاجی ان پرابلم‘، ’منجھے بسسراں دے‘، ’سجن سنگھ رنگروٹ‘ اور ’جٹ اینڈ جولیٹ‘ جیسی فلمیں شامل ہیں۔
انہوں نے کبھی ہندی فلموں میں کام نہیں کیا لیکن پنجابی انڈسٹری میں اپنے منفرد انداز اور بہترین کامیڈی ٹائمنگ کی وجہ سے بہت زیادہ پسند کیے گئے۔