بھارت کی پاکستان کے خلاف ایشیا کپ میں نہ کھیلنے کی قیاس آرائیاں دم توڑ گئی ہیں۔ بھارتی حکومت نے ٹیم کی ایشیا کپ 2025 میں شرکت کی منظوری دے دی ہے، جس سے آئندہ ماہ پاک بھارت ٹاکرے کی راہ ہموار ہوگئی ہے۔
گلف نیوز کے مطابق پہلگام دہشت گرد حملے کے بعد کئی روز تک جاری قیاس آرائیوں، سیاسی بحث اور عوامی ردعمل کے بعد بھارت کو ایشیا کپ 2025 میں شرکت کی باضابطہ منظوری مل گئی ہے۔
بھارتی وزارتِ کھیل نے جمعرات کو اعلان کیا کہ اگرچہ پاکستان کے ساتھ دوطرفہ کرکٹ معطل رہے گی تاہم بھارت ملٹی لیٹرل ایونٹس، بشمول ایشیا کپ، میں پاکستان سے کھیلنے پر تیار ہے۔
ایشیا کپ میں پاکستان اور بھارت کے درمیان بڑا مقابلہ 14 ستمبر کو دبئی میں شیڈول ہے، جو ٹورنامنٹ کا سب سے بڑا ایونٹ قرار دیا جا رہا ہے۔
بھارتی اسکواڈ کا اعلان
اسی موقع پر بھارت نے اپنی 15 رکنی ٹیم کا اعلان بھی کیا ہے جس کی قیادت سوریا کمار یادو کریں گے۔ سلیکٹرز نے تجربہ اور نوجوان ٹیلنٹ کا امتزاج برقرار رکھتے ہوئے اسکواڈ ترتیب دیا ہے تاکہ بھارت اپنے اعزاز کا کامیاب دفاع کر سکے۔
دوطرفہ تعلقات پر پالیسی برقرار
بھارتی وزارتِ کھیل نے واضح کیا کہ پاکستان کے ساتھ دوطرفہ کھیلوں کے تبادلے بحال نہیں ہوں گے اور نہ ہی پاکستانی ٹیموں کو بھارت میں کھیلنے کی اجازت دی جائے گی تاہم بین الاقوامی یا کثیرالملکی مقابلوں میں، خواہ وہ بھارت میں ہوں یا بیرون ملک، بھارتی ٹیمیں پاکستان کے خلاف حصہ لے سکیں گی۔
وزارت کھیل نے غیر ملکی کھلاڑیوں، ٹیم آفیشلز اور عالمی فیڈریشن کے نمائندوں کے لیے آسان ویزا پالیسی کا اعلان بھی کیا ہے۔
پاکستان کی تیاریاں تیز
دوسری جانب پاکستان کی ٹی ٹوئنٹی ٹیم دبئی پہنچ چکی ہے۔ سلمان آغا کی قیادت میں اسکواڈ نے جمعرات سے آئی سی سی اکیڈمی میں ٹریننگ شروع کر دی۔ ٹیم میں نمایاں تبدیلیاں کی گئی ہیں جن کے تحت سابق کپتان بابر اعظم اور محمد رضوان کو اسکواڈ سے باہر رکھا گیا ہے۔ ہیڈ کوچ مائیک ہیسن کا کہنا ہے کہ بابر اپنی بیٹنگ پر خاص طور پر اسپن کے خلاف کام کر رہے ہیں۔
اسکواڈ میں فاسٹ بولرز محمد وسیم اور سلمان مرزا کے ساتھ اوپنر فخر زمان بھی واپس آگئے ہیں، جو انجری کے باعث ویسٹ انڈیز کے خلاف سیریز نہیں کھیل سکے تھے۔ پاکستان 29 اگست سے افغانستان اور یو اے ای کے خلاف سہ ملکی سیریز کے بعد 12 ستمبر کو عمان کے خلاف ایشیا کپ مہم کا آغاز کرے گا۔
دبئی ٹاکرے پر دنیا کی نظریں
بھارت کی شرکت کی تصدیق اور پاکستان کے نئے اسکواڈ کے بعد اب دبئی میں 14 ستمبر کو شیڈول پاک—بھارت ٹاکرے پر سب کی نظریں ہیں۔ یہ مقابلہ ہمیشہ کی طرح کرکٹ سے بڑھ کر ایک بڑے سیاسی اور سفارتی تناظر میں بھی دیکھا جا رہا ہے، جس کی عالمی سطح پر گہری بازگشت متوقع ہے۔