چین کے وزیر خارجہ وانگ ای اور فیلڈ مارشل سید عاصم منیر کی ملاقات ہوئی ہے، جس میں پاک چین تعلقات مزید مضبوط بنانے پر اتفاق کیا گیا۔ چینی وزیر خارجہ وانگ ای نے کہا کہ پاکستانی فوج قومی استحکام کا ستون اور پاک چین دوستی و تعاون کی مضبوط محافظ ہے۔ فیلڈ مارشل سید عاصم منیر نے کہا ہے کہ پاک چین اسٹریٹجک شراکت داری چٹان کی طرح مضبوط ہے اور چین کے ساتھ دوستانہ تعلقات قائم رکھنا پورے پاکستانی قوم کا متفقہ مؤقف ہے۔
اتوار کے روز چینی وزیرِ خارجہ وانگ ای کی فیلڈ مارشل سید عاصم منیر سے اہم ملاقات پر چین کی وزارت خارجہ کا بیان سامنے آیا ہے۔
چین کی وزارتِ خارجہ کے مطابق اسلام آباد میں چین کے وزیر خارجہ وانگ ای اور پاکستان کے چیف آف آرمی اسٹاف فیلڈ مارشل سید عاصم منیر کے درمیان اہم ملاقات ہوئی، جس میں دو طرفہ تعلقات، علاقائی صورتحال اور باہمی تعاون کے فروغ پر تفصیلی تبادلہ خیال کیا گیا۔
چینی وزیر خارجہ نے گفتگو میں کہا کہ پاکستانی فوج قومی استحکام کا ستون اور پاک چین دوستی و تعاون کی مضبوط محافظ ہے۔ پاکستانی فوج نے ہمیشہ دونوں ممالک کی قیادت کے درمیان طے پانے والے اہم اتفاقِ رائے پر عمل درآمد میں بھرپور کردار ادا کیا ہے۔
وانگ ای نے مزید کہا کہ بدلتی ہوئی عالمی صورتحال اور غیر یقینی حالات میں مضبوط پاک چین تعلقات کا فروغ نہ صرف دونوں ممالک کے لیے بلکہ خطے کے امن و استحکام کے لیے بھی سودمند ہے۔
انہوں نے واضح کیا کہ چین نے ہمیشہ اپنی پڑوسی سفارت کاری میں پاکستان کو اولین ترجیح دی ہے۔
چینی وزیر خارجہ نے اس بات پر زور دیا کہ وقت کے کڑے امتحانات اور مختلف چیلنجز کے باوجود پاک چین تعلقات پہلے سے زیادہ مضبوط ہوئے ہیں۔
وانگ ای نے مزید کہا کہ دونوں ممالک ایک مضبوط اور روایتی دوستی قائم کر چکے ہیں، جسے مزید وسعت دینے کی ضرورت ہے۔
چینی وزیرخارجہ وانگ ای نے یہ بھی اعلان کیا کہ چین پاکستان کی علاقائی سالمیت اور قومی سلامتی کے تحفظ میں بھرپور تعاون جاری رکھے گا اور عالمی امور میں پاکستان کے بڑے کردار کا خیرمقدم کرتا ہے۔
چینی وزارت خارجہ کے مطابق فیلڈ مارشل سید عاصم منیر نے گفتگو کے دوران کہا کہ چین پاکستان کا “آہنی دوست” ہے اور دونوں ممالک ہمیشہ ایک دوسرے کے دکھ سکھ میں شریک رہے ہیں۔
فیلڈ مارشل نے کہا کہ پاک چین اسٹریٹجک شراکت داری چٹان کی طرح مضبوط ہے اور اس پر پوری پاکستانی قوم متفق ہے کہ چین کے ساتھ دوستانہ تعلقات قائم رکھنا قومی پالیسی کا حصہ ہے۔
سید عاصم منیر نے چین کی قیادت اور عوام کا پاکستان کی معاشی اور سماجی ترقی میں قیمتی تعاون پر شکریہ ادا کیا۔
انہوں نے مزید کہا کہ پاکستانی فوج انسداد دہشت گردی اور سیکیورٹی تعاون کو مزید فروغ دینے کے لیے تیار ہے اور پاکستان میں چینی اہلکاروں، منصوبوں اور اداروں کی حفاظت کو یقینی بنانے کے لیے ہر ممکن اقدامات کیے جا رہے ہیں۔
فیلڈ مارشل عاصم منیر نے زور دیا کہ پاک چین دوستی کو مزید مستحکم بنانے کے لیے مشترکہ اقدامات کیے جائیں گے اور ترقی و خوشحالی کی راہ پر مل کر سفر جاری رکھا جائے گا۔