حکومتِ پاکستان کی جانب سے افغان مہاجرین کی باعزت وطن واپسی کے لیے عملی اقدامات جاری ہیں، وفاقی و صوبائی حکومتوں کی ہم آہنگی سے افغان مہاجرین کی وطن واپسی ممکن بنائی جا رہی ہے۔
ایف سی اور سول انتظامیہ کی کاوشوں سے یہ عمل شفاف اور مؤثر انداز میں ہو رہا ہے، 45 سال پاکستان میں گزارنے والے افغان مہاجرین نے وطن واپسی پر اپنے جذبات کا خوبصورتی سے اظہار کیا۔
افغان مہاجرین کا کہنا ہے کہ وہ باوقار وطن واپسی پر حکومتِ پاکستان اور ایف سی کے انتہائی مشکور ہیں، ہم کسی دباؤ کے بغیر اپنی مرضی سے وطن واپس جا رہے ہیں۔
افغان مہاجرین کے مطابق خوراک اور سرحد تک سامان کی ترسیل میں حکومت اور ایف سی اہلکاروں نے بھرپور تعاون فراہم کیا، ہمیں ہماری خواہش کے مطابق تمام سہولیات فراہم کی جا رہی ہیں، پاکستان میں بہت اپنائیت ملی، ہمیں کبھی مہاجر نہیں سمجھا گیا۔
افغان مہاجرین نے کہا کہ پاکستان اور اداروں نے وطن واپسی کو عزت دار اور منظم انداز میں ممکن بنایا، بلوچستان میں 40 سال گزارنے کے بعد بہترین یادوں کے ساتھ وطن لوٹ رہے ہیں، حکومت ہر حد تک افغان مہاجرین کی سرحد تک رہنمائی، خوراک، اور ضروری سامان کی فراہمی کو یقینی بنا رہی ہے۔