‘شادی میں جیب کترے مہمان بن کر آگئے، تحائف میں قیمتی چیزوں کے بجائے پتھر اور چپلیں دے گئے’، نیتو کپور

شادی بیاہ کے قصے، چاہے عام لوگوں کے ہوں یا فلمی ستاروں کے، ہمیشہ دلچسپی کا باعث بنتے ہیں۔ بولی ووڈ کے معروف جوڑے رشی کپور اور نیتو کپور کی شادی بھی کئی دلچسپ اور حیران کن واقعات کی وجہ سے یاد کی جاتی ہے، جن کا ذکر اداکارہ اپنے ایک پرانے انٹرویو میں کر چکی ہیں۔

نیتو سنگھ اور رشی کپور 22 جنوری 1980 کو شادی کے بندھن میں بندھے تھے۔ ان کی شادی کی تقریب ممبئی کے علاقے چیمبور میں واقع آر کے ہاؤس میں منعقد ہوئی، جس میں فلمی دنیا کی متعدد معروف شخصیات نے شرکت کی۔

رشی کپور نے فلم ’بوبی‘ سے غیر معمولی شہرت حاصل کی تھی، جبکہ نیتو سنگھ بھی کم عمری سے فلموں میں کام کر رہی تھیں۔ دونوں کی جوڑی بولی ووڈ میں خاصی مقبول رہی اور وقت کے ساتھ ان کا تعلق شادی میں بدل گیا۔

نیتو کپور نے اپنے ایک پرانے انٹرویو میں بتایا تھا کہ شادی کی تقریب میں مہمانوں کا ہجوم اس قدر زیادہ تھا کہ وہ گھبرا کر بے ہوش ہوگئی تھیں۔ ان کے مطابق، رشی کپور بھی گھوڑی پر سوار ہونے سے پہلے بے ہوش ہوگئے تھے۔ تقریب میں غیر معمولی رش کے باعث انتظامات سنبھالنا مشکل ہوگیا تھا۔

اداکارہ نے شادی سے جڑا ایک اور دلچسپ واقعہ بیان کرتے ہوئے بتایا تھا کہ کچھ جیب کترے بھی مہمان بن کر تقریب میں داخل ہوگئے تھے۔ ان کے مطابق، ان افراد کی جانب سے دیے گئے تحائف میں قیمتی اشیا کے بجائے پتھر اور چپلیں نکلیں۔ تقریب میں لوگوں کی بڑی تعداد ہونے کی وجہ سے ان کی حقیقت کا بروقت اندازہ نہیں ہو سکا۔

رشی کپور 30 اپریل 2020 کو 67 برس کی عمر میں انتقال کر گئے تھے۔ وہ خون کے سرطان، یعنی لیوکیمیا، میں مبتلا تھے اور تقریباً دو سال تک اس بیماری کا علاج کرواتے رہے۔

ان کے انتقال کے بعد نیتو کپور وقتاً فوقتاً اپنی زندگی کے یادگار لمحات اور پرانی تصاویر سوشل میڈیا پر شیئر کرتی رہی ہیں۔ ان یادوں میں ان کی شادی کے واقعات بھی شامل ہیں، جو آج بھی مداحوں کی دلچسپی کا باعث بنتے ہیں۔