بیرسٹر گوہر کا کہنا ہے کہ بانی پی ٹی آئی نے کسی کو مذاکرات کی اجازت نہیں دی، پارٹی عہدیدار کی دوسرے عہدیدار کے خلاف بیان پر پابندی ہوگی۔ بانی پی ٹی آئی کی بہنوں سے ملاقات نہ کروانے کی مذمت کرتے ہیں۔
راولپنڈی میں اڈیالہ جیل کے باہر میڈیا سے گفتگو کرتے ہوئے چیئرمین پی ٹی آئی بیرسٹر گوہرنے کہا کہ بانی پی ٹی آئی سے 5 وکلا کی ملاقات کروائی گئی، بانی پی ٹی آئی سے ملاقات بہت ضروری ہے۔
بیرسٹر گوہر نے کہا کہ بانی پی ٹی آئی سے فیملی کی ملاقات نہیں کروائی گئی، عدالتی احکامات پرعمل درآمد ہونا چاہئے، بانی کی علیمہ خان سے ملاقات نہیں کروائی گئی، بشریٰ بی بی کی فیملی سے ملاقات جاری ہے۔
چیئرمین پی ٹی آئی نے کہا کہ بانی پی ٹی آئی نے کسی کو مذاکرات کی اجازت نہیں دی، بانی پی ٹی آئی دہشت گردی سے بہت افسردہ ہیں، پارٹی عہدیدار کی دوسرےعہدیدارکے خلاف بیان پرپابندی ہوگی۔
میڈیا سے گفتگو میں انھوں نے مزید کہا کہ تمام اپوزیشن جماعتوں سے اپیل ہے کہ ہماراساتھ دیں، بانی پی ٹی آئی کی بہنوں سے ملاقات نہ کروانے کی مذمت کرتے ہیں۔
اس سے قبل بانی پی ٹی آئی کی وکلاء سے ملاقات ختم ہونے کے بعد وکلا اڈیالہ جیل سے واپس روانہ ہو گئے، ملاقات اڈیالہ جیل کے کانفرنس روم میں 35 منٹ تک جاری رہی۔
ذرائع نے بتائیا کہ ملاقات میں سیاسی صورتحال، پارٹی امور پر بات چیت کی گئی، عدالتوں میں زیر سماعت اپیلوں کے حوالے سے بھی بات چیت کی گئی، ملاقات میں فیملی کی ملاقات نہ ہونے پر بھی مختلف آپشنز پر غور کیا گیا۔
ملاقات کرنے والوں میں بیرسٹر گوہر خان، فیصل چوہدری شامل تھے، سلمان صفدر، رائے سلمان کھرل اورعلی عمران شہزاد بھی ملاقات میں شامل تھے۔
اس سے قبل راولپنڈی میں پاکستان تحریک انصاف کے بانی عمران خان سے ملاقات کے دن کئی پارٹی رہنماؤں اور اہل خانہ کو اڈیالہ جیل کے باہر مختلف مقامات پر روک دیا گیا۔
پی ٹی آئی کے سیکرٹری جنرل سلمان اکرم راجہ کو پولیس نے اڈیالہ جیل کی جانب جانے سے روک دیا۔ اسی طرح نعیم بنجھوتہ کو بھی پولیس نے پہلے ناکے پر ہی روک لیا۔
ادھر بانی پی ٹی آئی کے وکیل بیرسٹر سلمان صفدر اڈیالہ جیل پہنچ گئے، جب کہ فوکل پرسن نیاز اللہ نیازی اور اعظم خان نیازی بھی ملاقات کے لیے جیل پہنچے۔