‘اپنا موازنہ ریلز میں نظر آنے والے جوڑوں سے نہ کریں’: کرن خان کا خواتین کو مشورہ

پاکستانی میزبان اور اداکارہ کرن خان نے شادی کو محض ایک رومانوی خواب سمجھنے والے نوبیاہتا جوڑوں کو مشورہ دیا ہے کہ وہ اپنی ازدواجی زندگی کو سوشل میڈیا اور ریلز کی خیالی دنیا سے دور رکھیں۔ کیونکہ وہاں دکھائی جانے والی زندگی ہمیشہ حقیقت کی عکاسی نہیں کرتی۔

کرن خان نے حال ہی میں نجی ٹی وی کے مارننگ شو میں بطور مہمان شرکت کی۔ دورانِ گفتگو انہوں نے شادی کے حوالے سے معاشرتی غلط فہمیوں اور لڑکیوں کے ذہنوں میں قائم غیر حقیقی تصورات پر کھل کر گفتگو کی۔

کرن خان نے بتایا کہ شادی کے حوالے سے سب سے بڑی غلط فہمی یہ ہے کہ اس کے بعد کا وقت محض ایک طویل اور خوشگوار ’ہنی مون پیریڈ‘ ہوتا ہے جہاں ہر چیز خوبصورت ہوتی ہے، جہاں ہر وقت محبت، خوشی اور رومانس ہی ہوتا ہے۔

انہوں نے اعتراف کیا کہ، ’جب میری کم عمری میں شادی ہوئی تھی تو میری سوچ بھی بالکل ایسی ہی تھی اسی لیے جب کوئی چھوٹی سی ناراضگی بھی ہوتی ہے تو یہی سوچ ذہن میں آتی ہے کہ شاید میرا فیصلہ ٹھیک نہیں تھا۔‘

ان کے مطابق لیکن حقیقت یہ ہے کہ شادی کے ابتدائی ماہ ہی دراصل ایک دوسرے کے ساتھ ہم آہنگی اور ’ایڈجسٹمنٹ‘ کا مرحلہ ہوتا ہے، کیونکہ دو مختلف سوچ اور مزاج کے افراد ایک ساتھ زندگی کا آغاز کرتے ہیں۔

انہوں نے مزید کہا کہ اس دوران دونوں کو ایک دوسرے کی شخصیت، پسند ناپسند اور عادات کے بارے میں نئی باتیں معلوم ہوتی ہیں، جنہیں سمجھنے اور قبول کرنے میں وقت لگتا ہے۔

اداکارہ نے جوڑوں پر زور دیا کہ وہ سوشل میڈیا ریلز میں دکھائے جانے والے جوڑوں کو دیکھ کر اپنی شادی کا موازنہ کرنے اور غیر حقیقی تصورات کے پیچھے بھاگنے کے بجائے اپنے رشتے کو بہتر بنانے پر توجہ دیں۔

ان کا کہنا تھا کہ جب ایک دوسرے کو سمجھنے کا یہ ابتدائی مرحلہ طے ہو جاتا ہے، تب آپ ہنی مون پریڈ شروع کریں کیونکہ آپ کو اس وقت ایک دوسرے کے مزاج کے مطابق سچویشن کو سنبھالنا کافی حد تک آجاتا ہے۔

کرن خان کے مطابق کامیاب رشتے کے لیے ایک دوسرے سے بات چیت کا سلسلہ کبھی ختم نہیں ہونا چاہیے۔ میاں بیوی کو اپنے احساسات اور جذبات کا اظہار شائستہ انداز میں نرمی سے کرنا چاہیے اور اختلاف یا ناراضی کی صورت میں غصے میں آنے کے بجائے تحمل اور سمجھ داری سے بات کرنی چاہیے۔

واضح رہے کہ کرن خان نے ستمبر 2026 میں معروف کاروباری شخصیت مرزا اشتیاق بیگ سے دوسری شادی کی تھی۔ دونوں کا نکاح مسجد الحرام میں ہوا تھا، جس کے بعد انہوں نے عمرہ بھی ادا کیا۔