بھارتی اداکار پون کلیان کی اہلیہ کا شادی کے 13 سال بعد طلاق کا اعلان

بھارتی اداکار اور آندھرا پردیش کے نائب وزیر اعلیٰ پون کلیان اور ان کی اہلیہ اینا کونیڈیلا نے شادی کے 13 سال بعد ایک دوسرے سے علیحدگی کا اعلان کر دیا ہے۔ دونوں نے مشترکہ بیان میں کہا ہے کہ انہوں نے یہ فیصلہ باہمی رضامندی اور ایک دوسرے کے احترام کو مدنظر رکھتے ہوئے کیا ہے۔

بھارتی میڈیا رپورٹس کے مطابق پون کلیان کے انسٹاگرام اکاؤنٹ پر گزشتہ رات جاری کیے گئے مشترکہ بیان میں دونوں نے اپنے اس فیصلے کی تصدیق کی۔

انہوں نے واضح کیا کہ ازدواجی رشتہ ختم ہونے کے باوجود وہ اچھے دوست رہیں گے اور اپنے بچوں کی پرورش کی ذمہ داری مل کر نبھائیں گے۔ ان کا کہنا تھا کہ بچوں کی خوشی اور بہتر مستقبل ہمیشہ ان کی مشترکہ ترجیح رہے گا۔

جوڑے نے اپنے خیر خواہوں سے اپیل کی کہ وہ زندگی کے اس ذاتی اور مشکل مرحلے کے دوران ان کی نجی زندگی کا احترام کریں۔ انہوں نے اس دوران ساتھ دینے اور محبت کا اظہار کرنے والے تمام افراد کا شکریہ بھی ادا کیا۔

پون کلیان کی ازدواجی زندگی اس سے قبل بھی دو بار طلاق پر ختم ہو چکی ہے۔ انہوں نے 1997 میں نندنی سے پہلی شادی کی تھی، تاہم 1999 میں دونوں کے درمیان علیحدگی ہوگئی۔

اس کے بعد انہوں نے 2009 میں اداکارہ رینو ڈیسائی سے شادی کی۔ اس جوڑے کے ہاں ایک بیٹی اور ایک بیٹے کی پیدائش ہوئی، تاہم 2012 میں ان کی شادی بھی طلاق پر ختم ہوگئی۔

پون کلیان نے 2013 میں روس سے تعلق رکھنے والی اینا کونیڈیلا سے تیسری شادی کی تھی۔ دونوں کے دو بچے ہیں جن کے نام پولینا انجانا پونوا اور مارک شنکر پونویچ ہیں۔

پون کلیان بھارت کے مشہور سینئر اداکار چرنجیوی کے چھوٹے بھائی ہیں۔ انہوں نے 1996 میں اداکاری کا آغاز کیا اور فلمی دنیا میں بڑی کامیابی حاصل کی، جس کے بعد انہوں نے سیاست کے میدان میں قدم رکھا۔

وہ جنا سینا پارٹی کے بانی ہیں اور 2024 کے حالیہ انتخابات میں تاریخی کامیابی حاصل کرنے کے بعد آندھرا پردیش کے نائب وزیر اعلیٰ کے عہدے پر فائز ہوئے ہیں۔