کوہاٹ: غیر قانونی گولڈ مائننگ کیخلاف پولیس کا آپریشن، دہشتگردوں کے حملے میں متعدد اہلکار زخمی

خیبر پختونخوا کے ضلع کوہاٹ میں دہشت گردوں اور جرائم پیشہ افراد کے گٹھ جوڑ سے جاری غیر قانونی گولڈ مائننگ کے خلاف پولیس کے گرینڈ آپریشن کے دوران دہشت گردوں نے پولیس اہلکاروں پر حملہ کردیا، جس کے نتیجے میں 8 اہلکار زخمی ہوگئے ہیں۔

ابتدائی اطلاعات کے مطابق واقعہ تھانہ گمبٹ کی حدود دربوکچ کے علاقے میں پیش آیا، جہاں آپریشن کے دوران فتنہ الخوارج سے منسلک دہشت گردوں نے پولیس نفری پر چھپ کر حملہ کیا۔

حملے میں زخمی ہونے والے 8 پولیس اہلکاروں کو اسپتال منتقل کردیا گیا جب کہ چند اہلکاروں کی شہادت کا خدشہ بھی ظاہر کیا جارہا ہے۔

واقعے کے بعد پولیس اور سیکیورٹی فورسز کے تازہ دم دستے جائے وقوعہ پر پہنچ گئے، جس کے بعد علاقے میں دہشت گردوں اور سیکیورٹی اہلکاروں کے درمیان فائرنگ کا تبادلہ شروع ہوگیا۔

ابتدائی اطلاعات کے مطابق فائرنگ کے تبادلے میں متعدد حملہ آوروں کے ہلاک ہونے کی اطلاعات ہیں جب کہ باقی ماندہ دہشت گردوں کا تعاقب جاری ہے۔

ڈی پی او کوہاٹ نے کہا ہے کہ فتنہ الخوارج کے دہشت گردوں کے خلاف آپریشن آخری خارجی کی ہلاکت تک جاری رہے گا۔

پولیس حکام کے مطابق کارروائی کا مقصد دہشت گردوں اور جرائم پیشہ عناصر کے گٹھ جوڑ کے تحت جاری غیر قانونی گولڈ مائننگ کا خاتمہ کرنا ہے جب کہ علاقے میں سیکیورٹی فورسز کی مزید نفری بھی تعینات کردی گئی ہے۔