بنگلہ دیشی وکٹ کیپر لٹن داس نے ٹیسٹ کرکٹ میں نیا عالمی ریکارڈ بناڈلا

بنگلادیش کے وکٹ کیپر بیٹر لٹن داس نے جنوبی افریقا کے خلاف جوہانسبرگ ٹیسٹ میں ایک اننگز کے دوران 8 کھلاڑیوں کو آؤٹ کرکے ٹیسٹ کرکٹ کی تاریخ میں نیا عالمی ریکارڈ قائم کردیا ہے۔ انہوں نے ایک ہی اننگز میں سنچری بنانے کے ساتھ وکٹوں کے پیچھے 8 شکار بھی کیے۔

بنگلادیشی وکٹ کیپر لٹن داس نے جنوبی افریقا کے خلاف جاری جوہانسبرگ ٹیسٹ کے چوتھے روز کاگیسو ربادا کو اسٹمپ آؤٹ کرکے ایک اننگز میں سب سے زیادہ شکار کرنے والے وکٹ کیپر کا اعزاز اپنے نام کیا۔

اس سے قبل ایک ٹیسٹ اننگز میں سب سے زیادہ 7 کھلاڑیوں کو آؤٹ کرنے کا ریکارڈ وسیم باری، باب ٹیلر، ایان اسمتھ، رڈلی جیکبز اور جوشوا ڈی سلوا کے پاس مشترکہ طور پر تھا۔ ڈی سلوا نے یہ کارنامہ 2023 میں انجام دیا تھا۔

لٹن داس نے جنوبی افریقا کے خلاف پہلی اننگز میں 120 رنز بھی بنائے، جس کے ساتھ وہ ایک ہی ٹیسٹ میچ میں سنچری بنانے اور 8 شکار کرنے والے منفرد وکٹ کیپر بن گئے۔

اس سے قبل ڈینس لنڈسے نے 1966 اور اے بی ڈی ویلیئرز نے 2013 میں جوہانسبرگ ہی میں سنچری بنانے کے ساتھ ایک اننگز میں 6 کھلاڑیوں کو آؤٹ کیا تھا۔

لٹن داس نے میچ کے تیسرے روز تک 6 کیچز پکڑے تھے، جن میں ایڈن مارکرم، زبیر حمزہ، مائیکل بریٹزکے، ویان مولڈر، مارکو یانسن اور سائمن ہارمر شامل تھے جب کہ چوتھے روز ریان ریکلٹن اور کاگیسو ربادا کو اسٹمپ آؤٹ کرکے اپنے شکاروں کی تعداد 8 کرلی۔

اس سے قبل لٹن داس نے بنگلادیش کی پہلی اننگز میں 179 گیندوں پر 120 رنز کی اننگز کھیلی، جس میں 14 چوکے اور ایک چھکا شامل تھا۔ انہوں نے توحید ہردوئے کے ساتھ چھٹی وکٹ کے لیے 206 رنز کی شراکت قائم کی، جس کی بدولت بنگلادیش نے 400 رنز بنائے، جو جنوبی افریقا کے خلاف اس کا ٹیسٹ کرکٹ میں سب سے بڑا مجموعہ ہے۔

لٹن داس نے گزشتہ ماہ افغانستان کے خلاف ٹیسٹ میچ میں بھی غیرمعمولی کارکردگی کا مظاہرہ کرتے ہوئے سنچری اور نصف سنچری بنانے کے ساتھ وکٹوں کے پیچھے 9 شکار کیے تھے۔ وہ یہ کارنامہ انجام دینے والے پہلے وکٹ کیپر بنے تھے اور انہیں پلیئر آف دی میچ بھی قرار دیا گیا تھا۔

بنگلادیش کے ون ڈے اور ٹی 20 کپتان لٹن داس اب ٹیسٹ کرکٹ میں ملک کی جانب سے سب سے زیادہ شکار کرنے والے وکٹ کیپر بھی بن گئے ہیں۔ ان کے شکاروں کی تعداد 154 ہوگئی ہے جب کہ مشفق الرحیم 113 شکار کے ساتھ دوسرے نمبر پر ہیں۔

Related posts