پاک فوج بلوچستان میں پائیدار امن، خوشحالی اور ترقی کے لیے عوام کے شانہ بشانہ کھڑی رہے گی: فیلڈ مارشل
چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے بلوچستان کے شہر تربت کا دورہ کیا ہے، جہاں انہیں خطے کی مجموعی سیکیورٹی صورتحال، آپریشنل تیاریوں اور بیرونی سرپرستی میں ہونے والی دہشت گردی کے خلاف جاری کامیاب کارروائیوں پر تفصیلی بریفنگ دی گئی۔
پاک فوج کے شعبہ تعلقات عامہ (آئی ایس پی آر) کی جانب سے جاری کردہ اعلامیے کے مطابق تربت آمد پر کور کمانڈر بلوچستان نے فیلڈ مارشل سید عاصم منیر کا استقبال کیا۔
دورے کے آغاز پر چیف آف ڈیفنس فورسز نے یادگارِ شہدا پر پھولوں کی چادر چڑھائی اور شہدا کے درجات کی بلندی کے لیے فاتحہ خوانی کی۔
بریفنگ کے دوران انہیں صوبے میں امن و امان کے قیام کے لیے کیے جانے والے اقدامات کے ساتھ ساتھ بلوچستان کے عوام کی فلاح و بہبود کے لیے جاری مختلف سماجی و معاشی ترقیاتی منصوبوں پر ہونے والی پیش رفت سے بھی آگاہ کیا گیا۔
تربت میں تعینات جوانوں سے ملاقات کے دوران گفتگو کرتے ہوئے فیلڈ مارشل نے دشوار گزار اور چیلنجنگ آپریشنل حالات کے باوجود ان کی اعلیٰ پیشہ ورانہ مہارت، آپریشنل تیاریوں اور مادر وطن کے دفاع کے لیے غیر متزلزل عزم کو سراہا۔
آئی ایس پی آر کے مطابق فیلڈ مارشل سید عاصم منیر نے اس عزم کا اعادہ کیا کہ پاک فوج صوبے میں پائیدار امن، خوشحالی اور ترقی کے حصول کے لیے بلوچستان کے عوام کے شانہ بشانہ کھڑی رہے گی۔