شمالی وزیرستان میں دھماکا خیز مواد تیار کرنے کی لیبارٹری پکڑی گئی، آئی ای ڈیز برآمد
خیبرپختونخوا کے ضلع شمالی وزیرستان کے علاقے میرعلی میں سیکیورٹی فورسز نے سرچ اینڈ کلیئرنس آپریشن کے دوران دہشت گردوں کا دھماکا خیز مواد تیار کرنے والا بڑا ٹھکانہ پکڑ لیا ہے، جہاں رہائشی مکانات کے اندر مبینہ طور پر بارودی مواد تیار کرنے کی لیبارٹریاں قائم کی گئی تھیں۔
کارروائی کے دوران بھاری مقدار میں دیسی ساختہ بم، آئی ای ڈیز، کواڈ کاپٹرز اور دھماکا خیز مواد کی تیاری سے متعلق لٹریچر برآمد کیا گیا ہے۔
سیکیورٹی ذرائع کے مطابق شمالی وزیرستان میں سیکیورٹی فورسز کا سرچ اینڈ کلیئرنس آپریشن جاری ہے، جس کے دوران میرعلی میں دہشت گردوں کے متعدد ٹھکانوں کو نشانہ بنایا گیا۔
ذرائع کا کہنا ہے کہ کارروائی کے دوران ایسے مقامات کا پتا چلا جہاں رہائشی مکانات کو دھماکا خیز مواد تیار کرنے کے لیے استعمال کیا جا رہا تھا۔
ذرائع کے مطابق ان ٹھکانوں سے بڑی تعداد میں دیسی ساختہ بم اور آئی ای ڈیز کے علاوہ کواڈ کاپٹرز بھی برآمد ہوئے ہیں۔ اس کے علاوہ دھماکا خیز مواد تیار کرنے کے طریقوں سے متعلق لٹریچر بھی سیکیورٹی فورسز نے اپنے قبضے میں لے لیا ہے۔
سیکیورٹی ذرائع کا کہنا ہے کہ رہائشی آبادی کے درمیان دھماکا خیز مواد تیار کرنے کی لیبارٹریاں قائم کرنا شہریوں کی جانوں کے لیے سنگین خطرہ ہے، کیونکہ اس نوعیت کی سرگرمیوں سے کسی بھی حادثے یا دھماکے کی صورت میں عام شہریوں کی زندگیوں کو نقصان پہنچ سکتا ہے۔
ذرائع کے مطابق میرعلی میں سیکیورٹی فورسز کے حالیہ آپریشن کے دوران دہشت گردوں کے متعدد ٹھکانے بھی تباہ کیے جا چکے ہیں، جبکہ علاقے میں سرچ اینڈ کلیئرنس کی کارروائیاں جاری ہیں۔
سیکیورٹی ذرائع کا کہنا ہے کہ میرعلی سے کواڈ کاپٹرز اور بارودی مواد کی برآمدگی دہشت گردوں کے سرحد پار روابط کی نشاندہی کرتی ہے، تاہم ان روابط کی نوعیت اور برآمد ہونے والے آلات کے ممکنہ استعمال سے متعلق مزید تفصیلات سامنے نہیں آئی ہیں۔
سیکیورٹی ذرائع کا مزید کہنا ہے کہ سیکیورٹی فورسز خیبرپختونخوا میں دہشت گردی کے خاتمے کے لیے پرعزم ہیں اور آخری دہشت گرد کے خاتمے تک کارروائیاں جاری رکھی جائیں گی۔