جنوبی افریقا کیخلاف دوسرے ٹیسٹ سے قبل بنگلہ دیش کو بڑا دھچکا، اہم کھلاڑی باہر
بنگلادیش کے تجربہ کار بیٹر مشفق الرحیم گروئن انجری کے باعث جنوبی افریقا کے خلاف دوسرے ٹیسٹ میچ سے باہر ہوگئے جب کہ دونوں ٹیموں کے درمیان دوسرا ٹیسٹ 23 نومبر سے سنچورین میں کھیلا جائے گا۔
بنگلادیش کرکٹ ٹیم کو جنوبی افریقا کے خلاف دوسرے ٹیسٹ سے قبل ایک اور کھلاڑی کی انجری کا سامنا ہے، تجربہ کار وکٹ کیپر بیٹر مشفق الرحیم جوہانسبرگ میں کھیلے گئے پہلے ٹیسٹ کے دوران گروئن انجری کا شکار ہوگئے تھے۔
کرکٹ ویب سائٹ کرک انفو کے مطابق بنگلادیشی فزیو بیجدال اسلام خان نے بتایا کہ مشفق الرحیم نے پہلے ٹیسٹ کے دوران بائیں گروئن کے حصے میں شدید درد کی شکایت کی تھی، جس کے بعد جوہانسبرگ میں ان کا ایم آر آئی اسکین کرایا گیا۔
فزیو کے مطابق اسکین رپورٹ میں شرونی کی ہڈی کے اطراف سوزش اور تکلیف کی تصدیق ہوئی ہے۔ مشفق الرحیم کو مزید پیچیدگیوں سے بچانے کے لیے فوری آرام اور مخصوص بحالی پروگرام کی ضرورت ہے، اسی وجہ سے وہ دوسرے ٹیسٹ کے لیے دستیاب نہیں ہوں گے۔
108 ٹیسٹ میچز کا تجربہ رکھنے والے 39 سالہ مشفق الرحیم نے جنوبی افریقا کے خلاف پہلے ٹیسٹ کی دونوں اننگز میں بالترتیب صفر اور 22 رنز بنائے تھے۔
بنگلادیش کو پہلے ہی فاسٹ بولر حسن محمود کی خدمات حاصل نہیں ہوں گی، جو کہنی کی انجری کے باعث دوسرے ٹیسٹ سے باہر ہوچکے ہیں۔ حسن محمود نے جوہانسبرگ ٹیسٹ میں 4 وکٹیں حاصل کی تھیں۔
مشفق الرحیم گزشتہ 4 ٹیسٹ میچز میں سے دوسرا میچ انجری کے باعث نہیں کھیل سکیں گے۔ وہ گزشتہ ماہ ویسٹ انڈیز کے خلاف پہلے ٹیسٹ سے بھی دائیں ہاتھ پر چوٹ لگنے کے باعث باہر ہوگئے تھے تاہم سلہٹ میں سیریز کے اگلے ٹیسٹ میں واپسی پر انہوں نے اپنے ٹیسٹ کیریئر کے 7 ہزار رنز مکمل کیے تھے اور ٹیم کو میچ ڈرا کرانے میں مدد دی تھی۔
بنگلادیش کو جنوبی افریقا کے دورے پر مستقل اوپنر شادمان اسلام کی خدمات بھی حاصل نہیں ہیں، جو ویسٹ انڈیز کے خلاف سلہٹ ٹیسٹ کے دوران ٹخنے کی انجری کا شکار ہوئے تھے۔
مشفق الرحیم کی جگہ دوسرے ٹیسٹ کی پلیئنگ الیون میں محمد نعیم یا جاکر علی کو شامل کیے جانے کا امکان ہے۔ دونوں کھلاڑی پہلے ہی اسکواڈ کا حصہ ہیں۔
واضح رہے کہ جنوبی افریقا کو دو ٹیسٹ میچز کی سیریز میں بنگلادیش کے خلاف ایک صفر کی برتری حاصل ہے۔ میزبان ٹیم نے جوہانسبرگ میں کھیلا گیا پہلا ٹیسٹ 9 وکٹوں سے جیتا تھا۔