دنیا کے آلودہ ترین شہروں میں لاہور کا آج بھی پہلا نمبر

پنجاب میں اسموگ اور فضائی آلودگی کی شدت برقرار ہے، لاہور ایک بار پھر دنیا کے آلودہ ترین شہروں کی فہرست میں پہلے نمبر پر آگیا۔

شہر میں صبح سویرے ایئر کوالٹی انڈیکس 481 ریکارڈ کیا گیا، جبکہ آلودگی کے باعث شہری سانس اور دیگر بیماریوں میں مبتلا ہونے لگے ہیں۔

آلودہ ترین شہروں کی فہرست میں بھارت کا دارالحکومت دہلی دوسرے نمبر پر رہا جہاں ایئر کوالٹی انڈیکس 231 ریکارڈ کیا گیا، جبکہ مصر کا شہر قاہرہ تیسرے نمبر پر ہے۔

دوسری جانب پنجاب میں دھند کے باعث موٹرویز پر ٹریفک کی روانی بھی متاثر ہوئی ہے۔ موٹروے ایم ٹو لاہور سے ہرن مینار تک دھند کے باعث بند کردی گئی، جبکہ لاہور سیالکوٹ موٹروے ایم الیون، ایم تھری اور ایم فور بھی شدید دھند کی لپیٹ میں ہیں۔

موٹروے پولیس کے ترجمان نے شہریوں کو ہدایت کی ہے کہ دھند کے دوران غیر ضروری سفر سے گریز کریں اور انتہائی ضرورت کے تحت سفر کرنا ہو تو صبح 10 بجے سے شام 6 بجے تک کا وقت منتخب کریں۔

ادھر محکمہ موسمیات نے آئندہ چند روز کے دوران بارش کا امکان مسترد کردیا ہے، جس کے باعث فضائی آلودگی میں فوری کمی کی امید بھی کم دکھائی دے رہی ہے۔

Related posts