فردوس جمال کے اہل خانہ سے متعلق بیان پر ناصر ادیب افسردہ

پاکستانی فلموں کے معروف مصنف ناصر ادیب نے سینئر اداکار فردوس جمال کے اہل خانہ سے متعلق سامنے آنے والی خبروں پر افسوس کا اظہار کرتے ہوئے کہا ہے کہ اگر ان کی اہلیہ اور بچوں نے انہیں بے سہارا چھوڑ دیا ہے تو یہ انتہائی تکلیف دہ بات ہے۔

ناصر ادیب حال ہی میں ایک پوڈکاسٹ میں شریک ہوئے جہاں انہوں نے فردوس جمال کی گھریلو زندگی سے متعلق خبروں پر اپنے خیالات کا اظہار کیا اور اہل خانہ کے رویے پر سوالات اٹھائے۔

ناصر ادیب کا کہنا تھا کہ ہمارے معاشرے میں اکثر ایسا دیکھنے میں آتا ہے کہ جب شوہر کمانے کے قابل نہیں رہتا یا کسی بری عادت میں مبتلا ہوجاتا ہے تو بعض اوقات بیوی اس سے علیحدگی اختیار کرلیتی ہے یا اسے گھر سے نکال دیتی ہے۔

انہوں نے اس حوالے سے ماں اور بیٹے کے رشتے کی مثال دیتے ہوئے کہا کہ اگر کوئی بیٹا بے روزگار ہو یا شراب نوشی جیسی بری عادت میں مبتلا ہو تب بھی ماں عموماً اسے تنہا نہیں چھوڑتی۔ وہ اس کے کھانے پینے کا خیال رکھتی ہے، رات گئے تک اس کا انتظار کرتی ہے اور گھر کا دروازہ کھولنے کے لیے بھی جاگتی رہتی ہے لیکن اسے گھر سے نہیں نکال دیتی۔

ان کے مطابق خواتین کو بھی اس پہلو پر غور کرنا چاہیے اور شوہر کو مشکل حالات میں اس طرح تنہا نہیں چھوڑنا چاہیے۔

ناصر ادیب نے فردوس جمال سے متعلق سامنے آنے والی خبروں کا حوالہ دیتے ہوئے کہا کہ انہوں نے چند روز قبل پڑھا تھا کہ اداکار کی اہلیہ اور بچوں نے انہیں چھوڑ دیا ہے اور گھر سے بھی نکال دیا ہے۔

ان کا کہنا تھا کہ فردوس جمال نے پوری زندگی اہنے خاندان کے لیے کمایا، گھر بنایا، بچوں کو پڑھایا لکھایا اور اپنی زندگی میں ان کی ضروریات پوری کرنے کی کوشش کی، لیکن اب جب وہ پہلے کی طرح کمانے کے قابل نہیں رہے تو مبینہ طور پر اہل خانہ کا رویہ تبدیل ہوگیا ہے اور انہوں نے انہیں تن تنہا چھوڑ دیا۔

ناصر ادیب نے اس صورت حال پر افسوس کا اظہار کرتے ہوئے کہا کہ اگر یہ خبریں درست ہیں تو یہ واقعی انتہائی دکھ کی بات ہے۔

Related posts