صنعتی ایریا پر ایرانی حملے میں زخمی پاکستانی کی حالت تشویش ناک ہے: بحرینی حکام

بحرین کی وزارت داخلہ نے کہا ہے کہ گزشتہ شب ایران کی جانب سے کیے گئے حملوں میں زخمی ہونے والے دو افراد میں سے ایک پاکستانی شہری تھا جس کی حالت تشویش ناک ہے اور علاج جاری ہے۔

بحرین کی وزارت داخلہ نے اتوار کو جاری کیے گئے بیان بتایا کہ ایرانی حملوں کے نتیجے میں ایک معذور بحرینی شہری بھی زخمی ہوا، جس کی حالت مستحکم ہے جب کہ دونوں زخمی افراد اسپتال میں زیرِ علاج ہیں۔

اس سے قبل بحرین نے گزشتہ شب ایران پر ایک شہری صنعتی تنصیب کو نشانہ بنانے کا الزام عائد کیا تھا۔ وزارت نے حملے کے مقام کی وضاحت نہیں کی، تاہم بتایا تھا کہ حملے کے نتیجے میں املاک کو نقصان پہنچا ہے۔

ابتدائی بیان میں بحرینی حکام نے کسی جانی نقصان کی اطلاع نہیں دی تاہم ایک ممکنہ خطرے سے متعلق الرٹ جاری کیا تھا، جسے نصف شب ختم کر دیا گیا تھا۔

خبر رساں ادارے اے ایف پی نے اس حملے سے متعلق رپورٹ میں مقامی رہائشیوں کے حوالے سے بتایا کہ انہوں نے بحرین کے مشرقی ساحل پر واقع جزیرے سِترہ کے اوپر دھواں اٹھتے دیکھا۔

ایرانی حملے کا نشانہ بننے والے بحرین کے اس جزیرے پر کئی صنعتی تنصیبات موجود ہیں، جن میں سرکاری آئل کمپنی باپکو کی ریفائنری بھی شامل ہے۔

ایران کا امریکی فوجی اڈوں اور ریڈارز کو نشانہ بنانے کا دعویٰ

ایران کے پاسدارانِ انقلاب (آئی آر جی سی) نے دعویٰ کیا ہے کہ اس کارروائی کے دوران بحرین میں امریکی فوجی ٹھکانوں کو میزائلوں اور ڈرونز سے نشانہ بنایا گیا۔

پاسدارانِ انقلاب کے مطابق بحرین کے الرفاع اور عوالی فوجی اڈوں پر حملے کیے گئے، جب کہ امریکی فوج کے پیٹریاٹ فضائی دفاعی نظام کے دو ریڈارز کو بھی نشانہ بنایا گیا۔

بیان میں مزید کہا گیا کہ ایرانی فضائی حدود کی کسی بھی خلاف ورزی کا سخت اور فیصلہ کن جواب دیا جائے گا۔

بحرین پر حملے ایسے وقت میں ہوئے ہیں جب آبنائے ہرمز میں مزید دو آئل ٹینکرز کو نشانہ بنایا گیا ہے۔ یہ اہم بحری گزرگاہ ایران اور امریکا کے درمیان جاری تنازع کا مرکزی نکتہ بن چکی ہے۔

ایران نے اس اہم بحری راستے کو غیر مجاز بحری جہازوں کے لیے بند کر رکھا ہے جب کہ امریکی فوج بھی آبنائے ہرمز پر مکمل کنٹرول کا دعویٰ اور ایرانی بندرگاہوں کی ناکہ بندی جاری رکھے ہوئے ہے۔

دوسری جانب آبنائے ہرمز میں روزانہ کی بنیاد پر آئل ٹینکرز میں آگ لگنے کے واقعات کا سلسلہ بھی جاری ہے۔ ایرانی حکام حالیہ ہفتوں کے دوران آبنائے ہرمز میں متعدد بحری جہازوں میں آگ لگنے کے واقعات کو بارودی سرنگوں سے ٹکرانے کا نتیجہ قرار دے چکے ہیں۔

دوسری جانب ایران کے نائب وزیر خارجہ کاظم غریب آبادی نے کہا ہے کہ قطر کا ایک وفد جمعے کی شام تہران پہنچا تھا، جہاں اس نے ایرانی حکام کے ساتھ دو گھنٹے تک بات چیت کی۔

ایران کے وزیر خارجہ عباس عراقچی نے بھی ایک حالیہ بیان میں کہا ہے کہ خطے میں جاری مذاکرات کو موقع دیا جانا چاہیے اور ایران کی ناکہ بندی کو معقول طریقے سے ختم کیا جانا چاہیے۔ ان کا کہنا تھا کہ ایران کا مؤقف واضح ہے اور جب تک اس کے مطالبات تسلیم نہیں کیے جاتے، آبنائے ہرمز کو کھولنے سے متعلق بات چیت بے معنی ہے۔

واضح رہے کہ ایران کے مطالبات میں تمام محاذوں پر جنگ کا خاتمہ، ایرانی اثاثوں کو منجمد کرنے کی منظوری، تیل کے حوالے سے عائد پابندیوں کا خاتمہ اور ایرانی بندرگاہوں سے امریکی ناکہ بندی کا خاتمہ شامل ہیں۔

Related posts