پاک بھارت کشیدگی کی وجہ سے واہگہ اٹاری بارڈر بند ہے تاہم بھارت سے پاکستانیوں اور یہاں سے بھارتی شہریوں کی اپنے ملک واپسی کا سلسلہ جاری رہا ہے۔
پاک بھارت کشیدگی کے بعد دونوں ممالک کے شہریوں کی وطن واپسی کا سلسلہ جاری ہے، ویزوں کی منسوخی کے بعد جمعے کے روز 191 پاکستانی براستہ واہگہ واپس آگئے جبکہ یہاں سے 287 بھارتی شہری واپس روانہ ہوئے۔
بھارتی حکومت کی خود ساختہ دہشت گردی کے واقعے نے 2 ایٹمی قوتوں کو جنگ کے قریب کردیا ہے، وہیں دونوں ممالک کے عوام کے لےی بھی مشکلات پیدا ہوئی ہیں۔
پاکستان سے واہگہ بارڈر کے راستے واپس جانے والے بھارتی شہریوں کا کہنا تھا کہ مودی حکومت جلد بازی کی بجائے اگر تحقیقات کر لیتی تو بہتر ہوتا، دہائیوں بعد اپنے عزیزواقارب سے ملنے آئے تھے لیکن اس اقدام نے سارے ارمان ٹھنڈے کردیے۔
اپنے میکے کے سفر پر گئی کئی خواتین بھی بھارتی حکومت کو کوستی رہیں۔ ایک خاتون یاسمین نے بتایا کہ وہ اور اس کی بھتیجی اپنے میکے گئے لیکن واپسی پر بھارتی حکومت نے کراچی کی رہائشی میری بھتیجی کو نہیں آنے دیا، بھتیجی کی پاکستان واپسی کے لیے حکام اپنا کردار ادا کریں۔
دونوں ممالک کے شہریوں کا کہنا تھا کہ جب بھی پاکستان بھارت کے عوام میں میل جول بڑھنے لگتا ہے تو اس طرح کے خودساختہ واقعات حالات کشیدہ کر دیتے ہیں۔