پاکستان کرکٹ ٹیم کے سابق کپتان شاہد آفریدی کا کہنا ہے کہ پہلگام واقعہ بھارت کا بہت بڑا ڈرامہ ہے، ان کی پہلے ہی پاکستان سے کھیلنے کی نیت نہیں ہے۔
لاہور میں نیشنل ہاکی اسٹیڈیم کے دورے کے دوران میڈیا سے گفتگو کے دوران سابق آل راؤنڈر شاہد آفریدی نے پہلگام واقعے پر بھارت کو آڑے ہاتھوں لے لیا۔
شاہد آفریدی نے کہا کہ بھارت کی ہمارے ساتھ کھیلنے کی نیت پہلے ہی نہیں تھی، پہلگام واقعے پر نظر ڈالیں تو صرف ڈرامہ نظر آتا ہے، کیسے ہوسکتا ہے دہشت گرد ایک گھنٹے تک کارروائی کرتے رہے اور اس پوری کارروائی کے دوران 8 لاکھ فوجی آئے ہی نہیں۔
سابق کپتان نے کہا کہ بھارت والے اپنے لوگوں کو خود مروا کر خود زندہ کروادیتے ہیں، بھارت کی بلنڈرز مارنے کہ عادت پرانی ہے، دہشت گردی کو کوئی بھی ملک یا دین سپورٹ نہیں کرتا، پاکستان اور اسلام امن اور بھائی چارے کا درس دیتا ہے، ہم نے ہمیشہ کوشش کی ہے کہ بھارت کے ساتھ اچھے تعلقات ہوں لیکن وہاں سے ہمیشہ منفی جواب ملا۔
انہوں نے کہا کہ 2016 ٹی 20 ورلڈ کپ میں ہمیں پتہ ہی نہیں تھا کہ بھارت جا کر کھیلنا ہے یا نہیں، بھارتی کبڈی ٹیم آجاتی ہے کرکٹ کی ٹیم نہیں آتی، اگر بھارت نے روکنا ہے تو تمام چیزیں بند کرو، پاکستان کرکٹ بورڈ میں تسلسل نہیں ہے۔
شاہد آفریدی نے مزید کہا کہ پی ایس ایل کا آغاز جنہوں نے کیا تھا انہیں کو جاری رکھنا چاہیئے تھا، پی ایس ایل کے کچھ فرنچائز مالکان مالی نقصان کا کہہ رہے ہیں، پی ایس ایل سے کافی فرنچائز مالکان نے فائدہ اٹھایا ہے۔
پاکستان کے سابق آل راؤنڈر نے کپتان قومی ٹیم محمد رضوان پر بھی تنقید کرتے ہوئے کہا کہ جنوبی افریقا کو شکست پر محمد رضوان نے کیوں نہیں کہا میرے ہاتھ میں کچھ نہیں، جسے کپتان بنایا جائے تو اسے بہانے نہیں کرنے چاہیئے، کپتان محمد رضوان کو میڈیا پر ایسی باتیں نہیں کرنی چاہیئے، مجھے پاکستان کرکٹ ٹیم سے کوئی لگاؤ نہیں ہے، مجھ سے کام لینا ہے تو گراس روٹ لیول پر کام لیا جائے۔
آرمی چیف جنرل عاصم منیر سے ملاقات پر شاہد آفریدی نے کہا کہ میں نے آرمی چیف سے ملاقات کرکے کسی کی چغلی نہیں کی اور نہ کسی سے چھپ کر ملا۔
شاہد آفریدی نے بتایا کہ محسن نقوی سے ملاقات میں کہا آپ کے دونوں عہدے بہت بڑے ہیں، محسن نقوی کو صرف چیئرمین پی سی بی کا عہدہ رکھنے کا مشورہ دیا، محسن نقوی پنجاب میں کافی ڈلیور کر چکے ہیں، کھلاڑیوں کو ڈومیسٹک سیزن میں کسی لیگ کی اجازت نہیں دینی چاہیئے، شعیب ملک فٹ ہے تو کھیل رہا ہے، میں اب نہیں کھیل سکتا۔
قومی کھیل ہاکی پر گفتگو کرتے ہوئے سابق کپتان نے کہا کہ آج گراؤنڈز اور قومی کھیل ہاکی تباہی کا شکار ہے، اسپورٹس منسٹری کا قومی کھیل کی طرف سے دھیان نہیں ہے، اسپورٹس منسٹری کو ہاکی کو سپورٹ کرنا چاہیئے، وزیراعظم شہبازشریف کھیل سے لگاؤ رکھتے ہیں، امید ہے وزیراعظم شہباز شریف ہاکی پر توجہ دیں گے۔