نائب وزیراعظم اسحاق ڈار نے ایرانی وزیر خارجہ کے ہمراہ میڈیا سے گفتگو کرتے ہوئے کہا کہ پاکستان خطے میں امن کا خواہاں ہے اور پہلگام واقعے کی غیر جانبدار تحقیقات کے لیے تعاون پر آمادہ ہے۔ عباس عراقچی نے کہا کہ اسحاق ڈار سے 3 بنیادی نکات پر بات ہوئی، پاک بھارت تعلقات پر تفصیلی گفتگو ہوئی۔
نائب وزیراعظم اور وزہر خارجہ اسحاق ڈار نے ایرانی وزیر خارجہ عباس عراقچی کے ہمراہ میڈیا سے گفتگو کی، انھوں نے کہا کہ ایرانی وزیر خارجہ کے ساتھ موجودہ صورتحال پر گفتگو ہوئی، ایران اور امریکا کے ساتھ مذاکرات خوش آئند ہیں۔
وزیرخارجہ اسحاق ڈار نے کہا کہ ایرانی وزیر خارجہ کو پہلگام سے متعلق بریفنگ دی، پاکستان کا پہلگام سے کوئی تعلق نہیں، پاکستان نے پہلگام واقعے کی غیر جانبدارانہ تحقیقات میں تعاون کی پیش کش کی ہے۔
نائب وزیراعظم اسحاق ڈار نے کہا کہ بہت سے ملکوں نے پاکستان کی حمایت کا اعلان کیا ہے، پاکستان خطے میں امن اور استحکام کیلئے پرعزم ہے، پاکستان پہل نہیں کرے گا، مہم جوئی ہوئی تو جواب دیں گے۔
اس موقع پر ایرانی وزیر خارجہ عباس عراقچی نے کہا کہ دورہ پاکستان میں نائب وزیراعظم سے ملاقات مفید رہی، اسحاق ڈار سے 3 بنیادی نکات پر بات ہوئی، پاک بھارت تعلقات پر تفصیلی گفتگو ہوئی۔
ایرانی وزیرخارجہ عباس عراقچی کی دفترخارجہ آمد پر نائب وزیراعظم اسحاق ڈار نے معزز مہمان کا استقبال کیا۔ نائب وزیراعظم اسحاق ڈار اور ایرانی وزیرخارجہ کی ملاقات ہوئی جس میں اسحاق ڈار نے بھارتی یکطرفہ اقدامات اور قومی سلامتی کمیٹی کے فیصلوں سے آگاہ کیا۔
دفتر خارجہ نے بتایا کہ عباس عراقچی اسلام آباد میں اپنے سرکاری دورے کے بعد بھارت روانہ ہوں گے، جہاں وہ مزید علاقائی سفارتی امور پر تبادلہ خیال کریں گے۔