بھارتی حکومت کا جنگی جنون اس کے اپنے عوام کے لیے ہی وبال جان بن گیا۔ بھارتی وزارت داخلہ نے ملک کی تمام ریاستوں میں بلیک آؤٹ اور فضائی حملوں سے بچاؤ کی مشقوں کا حکم دے دیا ہے۔ عوام مستقل خوف میں مبتلا ہو گئے ہیں۔
بھارتی وزارت داخلہ نے 7 مئی کو پورے ملک میں سول ڈیفنس کی فرضی مشقیں کروانے کا حکم دے دیا ہے بھارتی حکومت کے حکم کے مطابق فضائی حملے کے سائرن ٹیسٹ کیے جائیں گے۔
شہریوں، طلباء وغیرہ کو سول ڈیفنس کے پہلوؤں پر تربیت دی جائے گی تاکہ وہ کسی دشمن کے حملے کی صورت میں خود کو محفوظ رکھ سکیں۔
بلیک آؤٹ اور کیموفلیج کے پروٹوکولز کو فعال کیا جائے گا۔ یہ مشقیں تمام ریاستوں میں کی جائیں گی۔
ادھر بھارتی میڈیا کے مطابق بھارتی پنجاب کے علاقے فیروزپور کنٹونمنٹ میں 30 منٹ تک بلیک آﺅٹ ریہرسل کی گئی اس دوران پنجاب اسٹیٹ پاور کارپوریشن لمیٹڈ نے 30 منٹ تک بجلی منقطع کردی۔
بھارتی میڈیا کا بتانا ہے کہ فیروزپور کنٹونمنٹ میں ڈرل کے دوران مسلسل ہوٹر بجائے گئے۔
دریں اثنا، نیشنل سیکیورٹی ایڈوائزر اجیت دوول وزیراعظم مودی سے جلد ملاقات کریں گے۔