وفاقی وزیر اطلاعات عطاء اللہ تارڑ نے اسکائی نیوز، ٹی آر ٹی ورلڈ اور بی بی سی کو انٹرویوز دیتے ہوئے کہا ہے کہ بھارتی حملوں میں خواتین اور بچے جاں بحق ہوئے اور نقصان کا تفصیلی جائزہ لیا جا رہا ہے۔
انہوں نے کہا کہ بھارت نے عام شہری آبادی کو نشانہ بنایا، جبکہ ان علاقوں میں کوئی دہشت گردی کے کیمپ موجود نہیں تھے۔ ”ہم نے غیر ملکی اور مقامی صحافیوں کو ان علاقوں کا دورہ کرایا جہاں بھارت نے دہشت گردی کے کیمپ ہونے کا جھوٹا دعویٰ کیا تھا۔“
عطا تارڑ نے کہا کہ بھارت نے پاکستان کے پانچ مقامات پر حملہ کیا، پاکستان بھارتی جارحیت کی شدید مذمت کرتا ہے،
بھارت کے حملوں میں خواتین اور بچے جاں بحق ہوئے، نقصان کا تفصیلی جائزہ لیا جا رہا ہے، پاکستان جوابی کارروائی کا حق رکھتا ہے۔
انہوں نے کہا کہ ہمیں خدشہ تھا کہ بھارت حملہ کرے گا، پاکستان نے جارحیت میں پہل کبھی نہیں کی لیکن ہمیں اپنے دفاع کا حق حاصل ہے۔
وزیر اطلاعات نے کہا کہ جن جگہوں کو نشانہ بنایا گیا وہاں دہشت گردوں کے کیمپ نہیں تھے، غیر ملکی اور مقامی صحافیوں کو لائن آف کنٹرول کے قریب ان علاقوں کا دورہ کرایا جن کے بارے میں بھارت کا الزام تھا کہ وہاں دہشت گردوں کے کیمپ ہیں۔
انہوں نے کہاکہ بھارت کے پاس پہلگام واقعہ میں پاکستان کے ملوث ہونے کے کوئی شواہد موجود نہیں،
پہلگام کا علاقہ لائن آف کنٹرول سے 200 کلو میٹر دور ہے، پہلگام واقعہ بھارتی سیکورٹی فورسز کی ناکامی ہے، بھارت کی جانب سے شہری آبادی کو نشانہ بنانا انتہائی افسوسناک ہے، پاکستان دہشت گردی کے خلاف جنگ میں فرنٹ لائن اسٹیٹ ہے۔
وزیر اطلاعات نے کہا کہ پاکستان خود دہشت گردی کا شکار ہے، ہم اپنے مغربی علاقوں اور سرحدوں پر دہشت گردوں سے لڑ رہے ہیں، دہشت گردی کے خلاف جنگ میں ہم نے 90 ہزار جانیں قربان کی ہیں، جعفر ایکسپریس واقعہ رونما ہوا تو بھارت نے اس کی مذمت تک نہیں کی، بھارت خود دہشت گردی کی سرگرمیوں میں ملوث ہے، بھارت نے امریکہ، کینیڈا، آسٹریلیا میں سکھوں کا قتل عام کیا، ہمارے پاس بھارت کے خلاف دہشت گردی میں ملوث ہونے کے واضح ثبوت موجود ہیں، کلبھوشن یادیو بھارت کا نیول آفیسر ہے جو دہشت گردی کی سرگرمیوں میں ملوث تھا، وہ پاکستان کے پاس بھارت کے خلاف ایک ٹھوس ثبوت ہے۔
عطاء اللہ تارڑ نے کہاکہ پاکستان عالمی امن کا ضامن ہے، ہم دہشت گردوں اور دنیا کے درمیان ایک دیوار ہیں، پاکستان آج بھی دہشت گردوں کے خلاف جانوں کی قربانیاں دے رہا ہے، پاکستان اپنے دفاع کا حق رکھتا ہے، پاکستان کو کسی سے کمتر نہ سمجھا جائے،
آج بھی بلوچستان میں دہشت گردوں کے خلاف کارروائی کی گئی، قومی سلامتی کمیٹی کا اجلاس آج صبح طلب کیا گیا ہے، ہم بھارتی جارحیت کا جواب دے رہے ہیں، وزیراعظم محمد شہباز شریف نے سفارتی محاذ پر کئی ممالک کے سفراء سے ملاقات کی، عالمی رہنمائوں سے رابطے کئے۔