بھارت کی جارحیت حدیں پارکرنے لگی۔ بھارت کے بحری بیڑہ پاکستان کی طرف بڑھ رہا ہے، برطانوی اخبار ٹیلی گراف کے مطابق بحری بیڑے پر سپرسانک کروز میزائل بھی ہیں، نئی دہلی نے بحری بیڑے کو شمالی بحیرہ عرب کی طرف موڑدیا ہے، کراچی بندرگاہ اس بیڑے کی رینج میں ہے۔
برطانوی اخبار ٹیلی گراف نے دعوٰی کیا ہے کہ بھارت نے کراچی پورٹ پر حملے کی تیاری کرتے ہوئے اپنا مغربی بحری بیڑا شمالی بحیرہ عرب میں کراچی کے قریب تعینات کردیا۔ برطانوی اخبار کے مطابق بھارتی بحریہ کے بیڑے میں ایئر کرافٹ کریئر، ڈسٹرائرز، فریگیٹس اور اینٹی سب میرین جہاز شامل ہیں۔
اخبار کے مطابق بیڑے کے کچھ جہازوں پر براہموس سپرسونک کروز میزائل نصب ہیں جو 300 کلوگرام وزنی وار ہیڈ کے ساتھ 500 میل تک اپنے ہدف کو نشانہ بنانے کی صلاحیت رکھتے ہیں۔ ٹیلی گراف کے مطابق بھارتی بحری بیڑا پاکستانی ساحل سے 300 سے 400 میل کے فاصلے پر موجود ہے۔
برطانوی اخبار کا کہنا ہے کہ بھارت کا یہ اقدام دونوں ایٹمی طاقتوں کے درمیان کشیدگی کو نئی بلندیوں تک لے گیا ہے، بھارت کے اس اقدام سے عالمی سطح پر تشویش کی لہر دوڑ گئی ہے۔