سابق وزیراعظم نواز شریف نے کہا ہے کہ پاک بھارت جنگ میں پارلیمنٹ نے مثبت اور توانا کردار ادا کیا ۔ افواج پاکستان نے پیشہ ورانہ مہارت سے سرزمین وطن کا دفاع کیا۔ عوامی نمائندوں نےعوامی جذبات کی بھرپور ترجمانی کی، انھوں نے پاکستانی میڈیا کو بھی خراج تحسین پیش کیا۔
مسلم لیگ (ن) کے قائد نواز شریف نے رائیونڈ میں سینیٹ میں پارلیمانی پارٹی لیڈر اور قائمہ کمیٹی برائے امور خارجہ کے چیئرمین سینیٹر عرفان صدیقی سے ملاقات کی۔
سینیٹرعرفان صدیقی نے صدر مسلم لیگ (ن) کو پارلیمانی پارٹی کی کارکردگی کے حوالے سے رپورٹ پیش کی۔
ملاقات میں گفتگو کرتے ہوئے نواز شریف نے کہا کہ قومی سلامتی کے لیے ہر قسم کی سیاسی تقسیم بھلا کر ایک آواز میں بولنا خوش آئند اقدام ہے۔ عوام کے نمائندوں نے 24 کروڑ عوام کے جذبات کی ترجمانی کرتے ہوئے اپنی بہادر مسلح افواج کا حوصلہ بڑھایا۔
انھوں نے کہا کہ اس فتح پر ہم اللہ تعالیٰ کا بے حد شکر ادا کرتے ہیں جس نے ہمیں اس امتحان میں سرخرو کیا۔
سابق وزیراعظم نے پاکستانی میڈیا کو بھی خراج تحسین پیش کیا جس نے سچ پر مبنی بیانیہ کو دنیا کے سامنے رکھا اور دشمن کے جھوٹ کو پوری قوت سے بے نقاب کیا۔