نوشہرہ کے علاقے اضاخیل بالا میں افسوسناک واقعہ، زہریلی مٹھائی کھانے سے تین بچے جاں بحق ہوگئے جبکہ ان کی ماں کی حالت غیر ہو گئی ہے۔ جاں بحق ہونے والوں میں دو بہنیں اور ایک بھائی شامل ہیں۔
ریسکیو ذرائع کے مطابق جاں بحق ہونے والے بچوں میں 8 سالہ مریم، 6 سالہ حریم اور 4 سالہ یومان شامل ہیں۔
واقعے کے فوراً بعد بچوں کی لاشوں کو پوسٹ مارٹم کے لیے اور ان کی ماں کو فوری طبی امداد کے لیے قاضی حسین احمد میموریل اسپتال نوشہرہ منتقل کر دیا گیا۔
مردان میں زہریلا کھانا کھانے سے 7 افراد کی حالت غیر ہوگئی
پولیس اور دیگر متعلقہ اداروں نے واقعے کی تفتیش کا آغاز کر دیا ہے۔ ابتدائی معلومات کے مطابق زہریلی مٹھائی کھانے سے بچوں کی حالت بگڑی۔ مٹھائی کے نمونے تجزیے کے لیے لیبارٹری بھیج دیے گئے ہیں تاکہ زہر کی نوعیت اور ذمہ دار عناصر کا تعین کیا جا سکے۔