پاکستان اسٹاک مارکیٹ میں آج تیزی کے بعد مندی چھاگئی جس کے باعث سرمایہ کاروں کو اربوں کا نقصان برداشت کرنا پڑا۔
کاروباری ہفتے کے چوتھے روز کاروبار کے آغاز پر سٹاک ایکسچینج میں زبردست تیزی ریکارڈ کی گئی، 700 سے زائد پوائنٹس کے اضافے کے ساتھ پاکستان سٹاک مارکیٹ میں ہنڈرڈ انڈیکس ایک لاکھ 20 ہزار 699 پوائنٹس کی سطح پر پہنچ گیا۔
بعدازاں ٹریڈنگ کے دوران سٹاک مارکیٹ میں مندی چھاگئی جو کاروباری روز کے اختتام تک برقرار رہی جس کے باعث ہنڈرڈ انڈیکس 778 پوائنٹس کی کمی کے ساتھ ایک لاکھ 19 ہزار 153 پوائنٹس کی سطح پر بند ہوا۔
واضح رہے کہ گزشتہ کاروباری روز کے اختتام پر سٹاک ایکسچینج میں ہنڈرڈ انڈیکس 960 پوائنٹس کی برتری کیساتھ ایک لاکھ 19 ہزار 931 پوائنٹس کی سطح پر بند ہوا تھا۔
اسٹاک مارکیٹ میں آج 20 ارب 65 کروڑ 53 لاکھ 38 ہزار 866 روپے مالیت کے 22 کروڑ 32 لاکھ 84 ہزار 427 شیئرز کا لین دین ہوا۔
دوسری جانب زرمبادلہ کی مارکیٹ میں بھی بہتری کا رجحان رہا۔ انٹربینک میں امریکی ڈالر کی قیمت میں 6 پیسے کمی دیکھی گئی، جس کے بعد ڈالر 281.90 روپے پر آ گیا۔
مارکیٹ ماہرین کے مطابق اسٹاک مارکیٹ میں تیزی اور روپے کی قدر میں بہتری سرمایہ کاروں کے اعتماد کی عکاسی کرتی ہے، جب کہ آئندہ مالی سال کے بجٹ اور معاشی پالیسیوں سے متعلق مثبت توقعات بھی اس رجحان کا سبب بن رہی ہیں۔