ڈیرہ اسماعیل خان اور عارف والا میں فائرنگ کے 2 الگ الگ واقعات میں وکیل سمیت 3 افراد جاں بحق ہوگئے۔
تفصیلات کے مطابق خیبرپختونخوا کے ضلع ڈیرہ اسماعیل خان کے علاقے تھانہ پہاڑ پور کی حدود کوٹجائی یامین پیٹرول پمپ پر نامعلوم افراد نے فائرنگ کردی، فائرنگ کے نتیجے میں 2 افراد جاں بحق ہوگئے۔
پولیس کے مطابق موٹرسائیکل سوار ملزمان کی فائرنگ سے جاں بحق ہونے والوں کی شناخت مدثر اور حیات اللہ کے ناموں سے ہوئی۔
پولیس کے مطابق واقعہ سابقہ دشمنی کا شاخسانہ ہے، لاشیں پوسٹ مارٹم کے لیے اسپتال منتقل کردی ہیں تاہم واقعے سے متعلق مزید تفتیش جاری ہے۔
عارف والا
دوسری جانب پنجاب کے شہر عارف والا میں تھانہ صدر کے علاقے میں نامعلوم افراد نے فائرنگ کرکے وکیل سید تنویر کو قتل کردیا۔
پولیس کے مطابق ڈھگ شریف کے رہائشی سید تنویر شاہ ایڈووکیٹ صبح کے وقت گھر کے ساتھ زمینوں پر چکر لگانے گئے جہاں موٹر سائیکل سوار افراد نے ان پر فائرنگ کر کے انہیں قتل کر دیا۔
پولیس تھانہ صدر موقع پر پہنچ گئی، سید تنویر شاہ ایڈووکیٹ بار ایسوسی ایشن عارف والا کے ممبر تھے۔