بلوچستان کے ضلع خضدار میں اسکول بس پر بھارتی اسپانسرڈ فتنہ الہندوستان کے دہشت گردوں کے حملے میں زخمی ایک اور طالب علم دم توڑ گیا تاہم حملے میں شہید ہونے والے طلبا کی تعداد 5 ہوگئی۔
سیکیورٹی ذرائع کے مطابق بلوچستان کے ضلع خضدار میں اسکول بس پر ہونے والے بزدلانہ دہشت گرد حملے میں حیدر نامی طالب علم شدید زخمی ہوگیا تھا، جو دوران علاج دم توڑ گیا، جس کے بعد واقعے میں شہید طلبا کی تعداد 5 ہوگئی جبکہ شہید ہونے والوں میں 4 طالبات اور ایک طالب علم شامل ہیں۔
ذرائع کا مزید کہنا تھا کہ بھارت پاکستان کے خلاف سازشوں اور ذلت آمیز شکست و ہزیمت کے بعد بزدلانہ کارروائیوں پر اتر آیا ہے۔
خضدار میں بھارتی حمایت یافتہ دہشتگردوں کا اسکول بس میں دھماکا، بچوں سمیت 5 افراد شہید
سکیورٹی ذرائع کا کہنا ہے کہ بلوچستان اور خیبرپختونخوا میں دہشت گردی اور بے امنی پھیلانے کے لیے بھارت اپنی پراکسیوں کا استعمال کر رہا ہے۔ ان معصوم بچوں کے خون کا حساب فتنۃ الہندوستان اور ان کے بھارتی آقاؤں سے لیا جائے گا۔
واضح رہے کہ بلوچستان کے ضلع خضدار میں ایک اسکول بس کو بھارتی حمایت یافتہ دہشت گردوں نے نشانہ بنایا جس کے نتیجے میں 4 معصوم بچوں سمیت 5 افراد شہید ہو گئے۔شہدا میں چھٹی جماعت کی ثانیہ سومرو، ساتویں جماعت کی حفظہ کوثر اور دسویں جماعت کی عیشا سلیم شامل ہیں، حملے میں متعدد بچے بھی زخمی ہیں جو اسپتال میں زیرعلاج ہیں۔