خیبرپختونخوا اسمبلی میں اپوزیشن لیڈر ڈاکٹر عباد اللہ نے وزیراعلیٰ علی امین گنڈاپور کی لاہور روانگی اور سیاسی سرگرمیوں پر سخت تنقید کی ہے۔ ان کا کہنا تھا کہ پورا صوبہ بدامنی، دہشتگردی اور عوامی بے یقینی کی حالت میں ہے جبکہ وزیراعلیٰ اپنے لاؤ لشکر کے ساتھ پنجاب ایم پی ایز سے اظہارِ یکجہتی کے نام پر لاہور میں سیاسی شو کر رہے ہیں۔
ڈاکٹر عباد اللہ نے کہا کہ خیبرپختونخوا کے عوام کے جان و مال کی کوئی اہمیت نہیں رہی، اور ایسے وقت میں جب صوبے کے عوام مسائل کا شکار ہیں، وزیراعلیٰ کا لاؤ لشکر لے کر لاہور جانا عوامی احساسات کے ساتھ مذاق ہے۔
اپوزیشن لیڈر کا کہنا تھا کہ ایک سیاسی اعلان کے لیے سرکاری خزانے سے لاکھوں روپے خرچ کیے جا رہے ہیں جو سراسر ناانصافی ہے۔ انہوں نے سوال اٹھایا کہ ہزاروں گاڑیوں پر مشتمل قافلہ کس قانون اور انصاف کے تحت روانہ کیا گیا؟
ڈاکٹر عباد اللہ نے الزام عائد کیا کہ وزیراعلیٰ کا یہ طرزعمل عوامی خدمت نہیں بلکہ سیاسی نمائش ہے، جس سے ثابت ہوتا ہے کہ موجودہ حکومت کو عوامی مشکلات سے کوئی سروکار نہیں۔
انہوں نے مطالبہ کیا کہ خیبرپختونخوا کے عوام کو بدامنی، مہنگائی اور بے یقینی سے نکالنے کے لیے عملی اقدامات کیے جائیں اور حکومت اپنی ترجیحات درست کرے۔