چیئرمین واپڈا نوید اصغر چوہدری نے انکشاف کیا ہے کہ بھارت کی جانب سے پاکستان کا پانی بند کرنے کی سنگین دھمکیاں دی جا رہی ہیں، جس کے پیش نظر پاکستان نے پیشگی حفاظتی تیاریاں شروع کر دی ہیں۔ وہ آج نیوز کے پروگرام ”روبرو“ میں خصوصی انٹرویو دے رہے تھے جو آج رات 8 بجے نشر کیا جائے گا۔
انٹرویو کے دوران چیئرمین واپڈا نے بتایا کہ دریائے چناب پر پانی ذخیرہ کرنے کے لیے نیا ڈیم تعمیر کیا جائے گا تاکہ بھارت کے ممکنہ آبی حملے کا مؤثر جواب دیا جا سکے۔ انہوں نے مزید کہا کہ یہ ڈیم ضلع چنیوٹ کے قریب تعمیر کیا جائے گا اور اس کا مقصد نہ صرف پانی کا ذخیرہ بڑھانا ہے بلکہ قومی آبی سلامتی کو بھی یقینی بنانا ہے۔
نوید اصغر چوہدری کا کہنا تھا کہ واپڈا ملک کے آبی وسائل کے تحفظ کے لیے ہمہ وقت متحرک ہے، اور موجودہ علاقائی حالات کے پیش نظر ڈیمز کی تعمیر ناگزیر ہو چکی ہے۔
واضح رہے کہ بھارت کی جانب سے ان دنوں سندھ طاس معاہدے کی سنگین خلاف ورزی کی جارہی ہے، جس پر پاکستانی حکام شدید تشویش کا اظہار کر چکے ہیں۔