پاکستان حالیہ ہفتوں میں شدید بارشوں اور سیلابوں کی تباہ کاریوں کا سامنا کر رہا ہے، جن میں سیکڑوں جانیں جاچکی ہیں اور گھروں کی تباہی سے ہزاروں لوگ بے گھر ہوچکے ہیں۔

ملک کے بالائی علاقوں میں مون سون کے ساتویں اسپیل نے شدید تباہی مچا رکھی ہے، خاص طور پر خیبرپختونخوا، گلگت بلتستان اور آزاد کشمیر کے مختلف اضلاع میں کلاؤڈ برسٹ، لینڈ سلائیڈنگ اور سیلابی ریلوں کے باعث 300 سے زائد افراد جان کی بازی ہار چکے ہیں جبکہ متعدد زخمی اور لاپتہ ہیں۔

یہ قدرتی آفات محض حادثات نہیں بلکہ عالمی ماحولیاتی تبدیلی کے سنگین اثرات کی واضح مثال ہیں۔

ایک تازہ تحقیق سے معلوم ہوا ہے کہ یہ بارشیں انسانی سرگرمیوں کی وجہ سے ہونے والی ماحولیاتی تبدیلی کے باعث مزید شدت اختیار کر چکی ہیں جس کے نتیجے میں سیلاب کی شدت میں اضافہ ہوا ہے۔

پاکستان میں موسمیاتی تبدیلیاں ایک سنگین مسئلہ بنتی جا رہی ہیں، جس سے ملک کے مختلف حصوں میں مختلف اثرات مرتب ہو رہے ہیں۔

درجہ حرارت میں اضافہ، بارشوں کے پیٹرن میں تبدیلی، سیلاب اور گلیشیئرز کے پگھلنے جیسے مسائل پاکستان کو درپیش ہیں۔

پاکستان ان 10 ممالک میں سے ایک ہے جو موسمیاتی تبدیلیوں اور قدرتی آفات سے بہت زیادہ متاثر ہو رہا ہے۔

گذشتہ ایک صدی میں پاکستان میں اوسط درجہ حرارت میں صفراعشاریہ چھ تین ڈگری سینٹی گریڈ کا اضافہ دیکھا گیا ہے اور کراچی کے ساحل کے ساتھ سمندر کی سطح میں ایک اعشاریہ ایک ملی میٹر کا اضافہ ہوا ہے۔

پاکستان میں سیلاب اور بارشوں کی شدت

این ڈی ایم اے کی رپورٹ کے مطابق 24 جون سے 23 جولائی کے دوران پاکستان میں بارشوں میں 10 سے 15 فیصد اضافہ ہوا، جس کا تعلق عالمی درجہ حرارت میں اضافے سے ہے۔ یہ سب کچھ عالمی موسمیاتی تبدیلی کی وجہ سے ہے، جو بارشوں کو غیر معمولی اور زیادہ شدید بناتی ہے۔

ماحولیاتی تبدیلی کے عالمی تناظر میں اثرات

موسمیاتی تبدیلی زمین کے درجہ حرارت کو بڑھا رہی ہے، جس سے خشک سالی، طوفان، جنگلاتی آگ، اور سیلاب جیسے موسمی واقعات کی شدت میں اضافہ ہوتا ہے۔ جب زمین کا درجہ حرارت بڑھتا ہے تو موسموں کے نظام میں وسیع پیمانے پر تبدیلیاں رونما ہوتی ہیں۔

ماحولیاتی سائنس دانوں نے ثابت کیا ہے کہ پچھلے 200 سالوں میں زمین کے درجہ حرارت میں اضافے کا سبب انسانی سرگرمیاں ہیں۔ صنعتی انقلاب سے پہلے یعنی 1800 کی دہائی کے آخر تک، زمین کا اوسط سطحی درجہ حرارت آج کی نسبت تقریباً 1.2 ڈگری سیلسیس کم تھا۔

آج کا درجہ حرارت پچھلے ایک لاکھ سالوں میں سب سے زیادہ ہے۔ گزشتہ دس سال (2011-2020) ریکارڈ کیے گئے سب سے گرم تھے، اور پچھلی چار دہائیوں میں ہر دہائی 1850 کے بعد سب سے گرم رہی ہے۔

عالمی درجہ حرارت میں اضافے کی وجہ سے نہ صرف درجہ حرارت بلند ہو رہا ہے بلکہ بارش کی شدت اور تعداد میں بھی بے پناہ اضافہ ہو رہا ہے، جس نے جنوبی ایشیا سمیت دنیا کے کئی خطوں میں موسمی آفات کی رفتار کو ماہرین کی توقعات سے کہیں زیادہ تیز کر دیا ہے۔

سی این این میں شائع ہونے والی ایک رپورٹ میں اسلام آباد کے ماحولیاتی سائنس دان جیکب اسٹائنر نے کہا کہ گزشتہ چند ہفتوں میں نہ صرف پاکستان بلکہ پورے جنوبی ایشیا میں ایسے موسمی واقعات رونما ہوئے ہیں جو ماہرین کے لیے حیران کن ہیں۔

اسٹائنر نے بتایا کہ وہ موسمی واقعات جن کی ماہرین کو 2050 تک رونما ہونے کی توقع تھی، 2025 میں ہی وقوع پزیر ہو چکے ہیں، کیونکہ اس سال گرمی کی شدت اوسط درجہ حرارت سے کہیں زیادہ رہی ہے۔

آسٹریا کی یونیورسٹی آف گراز کے ماہر نے کہا کہ پہاڑی علاقوں میں پانی کے ذخائر اور ان سے منسلک خطرات میں خاص طور پر اضافہ ہو رہا ہے۔

سی این این میں شائع شدہ رپورٹ کے مطابق ورلڈ واچ ایجوکیشن (WWA) کی تازہ تحقیق کے مصنفین نے اپنی رپورٹ میں واضح کیا ہے کہ پاکستان میں ہونے والی بارشیں موسمیاتی تبدیلی کی وجہ سے سیلابوں کو مزید شدید اور خطرناک بنا رہی ہیں۔

ماحولیاتی سائنس دانوں کے مطابق، جب فضا کا درجہ حرارت بڑھتا ہے تو وہ زیادہ نمی جذب کر سکتی ہے، جس کی وجہ سے بارش کی شدت بڑھ جاتی ہے اور نتیجتاً سیلاب کے امکانات اور بھی بڑھ جاتے ہیں۔

اس تحقیق کی مرکزی مصنفہ، مریم زکریا، جو کہ ایمپیریل کالج لندن کے سینٹر فار انوائرنمنٹل پالیسی سے تعلق رکھتی ہیں، ان کا کہنا ہے کہ ’درجہ حرارت میں ہر ایک اعشاریہ درجے کا اضافہ مون سون کی بارشوں کو زیادہ بھاری بنا دیتا ہے، جو اس بات کی وضاحت کرتا ہے کہ فوسل ایندھن سے فوری طور پر قابل تجدید توانائی کی طرف منتقلی کیوں اتنی ضروری ہے۔‘

یہ تحقیق موسمیاتی تبدیلی کی شدت کو سمجھنے میں اہم کردار ادا کرتی ہے، کیونکہ یہ واضح کرتی ہے کہ گلوبل وارمنگ نہ صرف درجہ حرارت بڑھا رہی ہے بلکہ بارشوں کے پیٹرن اور شدت میں بھی نمایاں تبدیلیاں لا رہی ہے۔ خاص طور پر پاکستان جیسے ممالک جہاں مون سون کا بڑا کردار ہوتا ہے، وہاں اس طرح کی موسمی تبدیلیاں معاشرتی اور اقتصادی نظام کو شدید متاثر کر رہی ہیں۔

جنوبی ایشیا کے ہمالیائی پہاڑی علاقوں میں بھی پانی کی غیر معمولی زیادتی نے کئی قدرتی آفات کو جنم دیا ہے۔ پگھلتے ہوئے گلیشیئرز کی وجہ سے بننے والے جھیلوں کے پانی کے بہاؤ نے نیپال اور چین کے درمیان ایک اہم پل کو تباہ کر دیا ہے اور جولائی میں کئی ہائیڈرو پاور ڈیمز بھی تباہ ہو گئے۔

شمالی بھارت کے ایک گاؤں میں بھی حال ہی میں سیلاب اور زمین کھسکنے کے واقعات پیش آئے، جن میں کم از کم چار افراد ہلاک اور سیکڑوں لاپتہ ہو گئے۔

الجزائر کے مطابق گزشتہ سال وزارت موسمیاتی تبدیلی اور اطالوی تحقیقی ادارے EvK2CNR کے مشترکہ مطالعے میں پاکستان میں 13,000 سے زائد گلیشیئرز موجود ہیں۔

تاہم، درجہ حرارت میں بتدریج اضافہ ان گلیشیئرز کے پگھلنے کا باعث بن رہا ہے، جس سے سیلاب کا خطرہ بڑھ رہا ہے، انفراسٹرکچر کو نقصان پہنچ رہا ہے، جان و مال کا نقصان ہو رہا ہے، کمیونٹیز کو خطرات لاحق ہیں اور پانی کی کمی کا سامنا بڑھ رہا ہے۔

اس کے علاوہ تعلیم کا نظام بھی شدید متاثر ہوا ہے اور صحت کی سہولیات تک رسائی بھی مشکل ہو گئی ہے۔ صاف پانی کی کمی، پانی سے پیدا ہونے والی بیماریوں میں اضافہ، ہسپتالوں اور کلینکوں تک محدود رسائی، اور بچوں کی اموات میں اضافہ ان سب مسائل نے زندگی کو مزید مشکل بنا دیا ہے۔

رپورٹ میں کہا گیا ہے کہ یہ سب عوامل مل کر انسانی جانوں کو خطرے میں ڈال رہے ہیں اور معاشرتی ترقی کی راہ میں بڑی رکاوٹیں پیدا کر رہے ہیں۔

الجزائر کے مطابق گذشتہ ماہ ایمینیسٹی انٹرنیشنل نے اپنی رپورٹ میں بتایا کہ پاکستان کا صحت کا نظام اور آفات سے نمٹنے کے ادارے بچوں اور بزرگوں کی بڑھتی ہوئی ضروریات کو پورا کرنے میں ناکام ہو رہے ہیں، جو موسمیاتی تبدیلیوں سے پیدا ہونے والی شدید موسمی حالات میں سب سے زیادہ متاثر ہوتے ہیں۔

لورا ملز، جو ایمینیسٹی انٹرنیشنل کے بحران ردعمل پروگرام کی محقق ہیں، کے مطابق پاکستان میں بچے اور بوڑھے موسمیاتی بحران کے فرنٹ لائن پر ہیں جہاں شدید گرمی اور سیلابوں کی وجہ سے اموات اور بیماریوں کی شرح غیر معمولی طور پر بڑھ گئی ہے۔

گلیشیئر کے پگھلنے کی وجہ سے آنے والے سیلاب نے نہ صرف زمین اور زندگی کو تباہ کیا بلکہ سندھ کے صوبے میں ہزاروں سال پرانی تہذیب کو بھی بہا لے گیا۔ یہاں کی مساجد، مندر، اسکول، اسپتال، تاریخی عمارتیں اور یادگاریں سب سیلاب کی تباہ کاریوں میں غائب ہو گئیں۔

یہ واقعات اس بات کا اشارہ ہیں کہ عالمی درجہ حرارت میں اضافے کے نتیجے میں موسمی نظام شدید اور غیر متوقع شکل اختیار کر چکے ہیں، جس سے خطے کی اقتصادیات، انفراسٹرکچر اور انسانی جانوں کو ناقابل تلافی نقصان پہنچ رہا ہے۔ مزید یہ کہ گلیشیئرز کے پگھلنے کی وجہ سے پہاڑی علاقوں میں پانی کی قلت اور سیلاب دونوں کا خطرہ بڑھ گیا ہے، جس سے مقامی باشندوں کی زندگیوں اور معاشی سرگرمیوں کو شدید خطرات لاحق ہو گئے ہیں۔

اگرچہ اکثر لوگ موسمی تبدیلی کو صرف درجہ حرارت میں اضافے تک محدود سمجھتے ہیں، لیکن یہ اس کا صرف ایک پہلو ہے۔ زمین ایک مربوط نظام ہے جہاں ایک جگہ تبدیلی دیگر حصوں کو متاثر کرتی ہے۔ اس کے نتیجے میں شدید خشک سالی، پانی کی قلت، آگ لگنے کے واقعات، سمندری سطح میں اضافہ، سیلاب، قطبی برف کا پگھلنا، تباہ کن طوفان اور حیاتیاتی تنوع میں کمی جیسے سنگین مسائل سامنے آ رہے ہیں۔

ماحولیاتی تبدیلی سے انسانی صحت، خوراک کی پیداوار، رہائش، حفاظت اور روزگار پر براہ راست اثرات مرتب ہو رہے ہیں۔ خاص طور پر چھوٹے جزیرہ نما ممالک اور ترقی پذیر ممالک کے لوگ زیادہ متاثر ہو رہے ہیں۔ سمندری سطح میں اضافے اور کھارے پانی کے زمین پر داخلے کے باعث کئی کمیونٹیز کو آباد کاری چھوڑ کر دوسری جگہ منتقل ہونا پڑ رہا ہے۔

طویل خشک سالیاں قحط کا خطرہ بڑھا رہی ہیں اور مستقبل میں موسمی واقعات کی وجہ سے بے گھر ہونے والوں کی تعداد میں نمایاں اضافہ متوقع ہے۔

سی این این کی ایک رپورٹ کا کہنا ہے کہ عالمی سطح پر، اقوام متحدہ کی رپورٹ کے مطابق، اگر موجودہ گیسوں کے اخراج کو کم نہ کیا گیا تو اس صدی کے آخر تک عالمی درجہ حرارت 1.5 سے 2 ڈگری سیلسیس تک بڑھ سکتا ہے، جو مزید تباہ کن اثرات کا باعث بنے گا۔

اگرچہ پاکستان عالمی فضاء میں پیدا ہونے والے گرین ہاؤس گیسوں کا ایک فیصد سے بھی کم حصہ ہے، مگر تحقیق سے معلوم ہوتا ہے کہ پاکستان کو موسمیاتی تبدیلی کے باعث شدید موسمی واقعات سے بہت زیادہ نقصان اٹھانا پڑتا ہے۔

پاکستان نے 2022 میں اپنی سب سے تباہ کن مون سون کا سامنا کیا، جس میں شدید سیلاب آئے جنہوں نے 1700 سے زائد افراد کی جانیں لے لیں اور تقریباً 40 ارب ڈالر کا مالی نقصان ہوا۔

اقوام متحدہ کے مطابق، موسمیاتی تبدیلی کے نقصان اور اس کے اثرات سے نمٹنے کے لیے قائم کیے گئے عالمی فنڈز، خاص طور پر ان ممالک کی مدد کے لیے جیسے پاکستان، مطلوبہ مالی وسائل سے بہت کم ہیں۔

سی این این میں شائع شدہ رپورٹ کے مطابق اقوام متحدہ نے خبردار کیا ہے کہ اس کا نقصان اور نقصان کا فنڈ صرف معمولی رقم رکھتا ہے جو ہر سال انسان کی وجہ سے پیدا ہونے والی موسمیاتی تبدیلی کی وجہ سے ہونے والے معاشی نقصانات کو پورا کرنے کے لیے ناکافی ہے۔

اسی طرح، اقوام متحدہ کی رپورٹس میں یہ بھی بتایا گیا ہے کہ ترقی یافتہ ممالک جیسے امریکہ اور یورپی ممالک، جو کہ فضاء میں سب سے زیادہ گرین ہاؤس گیسوں کے ذمہ دار ہیں، موسمیاتی تبدیلی کے اثرات سے نمٹنے کے لیے مالی امداد میں کافی پیچھے ہیں۔

یہ مالی وسائل سیلاب سے متاثرہ علاقوں میں رہائش اور بنیادی ڈھانچے کو بہتر بنانے کے لیے استعمال کیے جا سکتے ہیں تاکہ مستقبل میں ایسے نقصان کو کم کیا جا سکے۔

ورلڈ ویدر ایٹریبیوشن (WWA) کی ایک رپورٹ کے مطابق پاکستان کی تیزی سے بڑھتی ہوئی شہری آبادی کا بڑا حصہ عارضی اور کچے مکانات میں رہتا ہے، جو اکثر سیلاب سے متاثرہ خطرناک علاقوں میں واقع ہیں۔ جہاں سیلابی پانی گھروں کو تباہ کر کے انسانی جانیں لیتا ہے۔

ریڈ کراس ریڈ کریسنٹ کلائمیٹ سینٹر کی مایا والبرگ، جو اس رپورٹ کی مصنفین میں شامل ہیں، نے پریس بیان میں کہا، ”پاکستان کی آدھی شہری آبادی ایسے کمزور اور غیر محفوظ علاقوں میں رہائش پذیر ہے جہاں سیلابی پانی گھروں کو تباہ کر کے انسانی جانیں لیتا ہے۔“

انہوں نے مزید کہا کہ ”ایسے علاقوں میں سیلاب برداشت کرنے والے مضبوط مکانات کی تعمیر اور سیلابی خطرے والے علاقوں میں تعمیرات سے گریز، مون سون کی شدید بارشوں کے اثرات کو کم کرنے میں مددگار ثابت ہو سکتا ہے۔“

پاکستان میں بھی موسمیاتی خطرات سے نمٹنے کے لیے موجودہ حفاظتی اقدامات ناکافی اور غیر مؤثر ثابت ہو رہے ہیں۔ اگرچہ این ڈی ایم اے NDMA اور پی ڈی ایم اے PDMA جیسے ادارے موجود ہیں، لیکن ان کے پاس جدید ٹیکنالوجی، مناسب فنڈز اور تربیت یافتہ عملے کی کمی ہے۔

بارشوں سے قبل الرٹ تو جاری ہوتے ہیں مگر نچلی سطح پر ان پر عملدرآمد نہ ہونے کے برابر ہے۔ ندی نالوں کی صفائی صرف کاغذی کارروائیوں تک محدود ہے، جس کے نتیجے میں ہلکی بارش بھی شدید سیلابی کیفیت اختیار کر لیتی ہے۔

بلدیاتی ادارے غیرفعال ہیں اور سیاسی مداخلت کے باعث انتظامی معاملات متاثر ہوتے ہیں۔ عوامی آگاہی مہمات کا بھی شدید فقدان ہے، جس سے عام شہری موسمی خطرات سے نمٹنے کے لیے تیار نہیں ہوتے۔

نتائج اور سفارشات

موسمیاتی بحران سے نمٹنے کے لیے ہنگامی اور طویل المدتی اقدامات کی ضرورت ہے۔ سب سے پہلے حکومت کو قومی ماحولیاتی ایمرجنسی کا اعلان کرنا چاہیے تاکہ تمام ادارے متحرک ہوں۔

ملک بھر میں شجرکاری کی مہمات کو منظم کیا جائے۔ ہاؤسنگ سوسائٹیوں کی منظوری ماحولیاتی اثرات کی رپورٹ سے مشروط کی جائے اور ندی نالوں پر تجاوزات کے خلاف سخت کارروائی کی جائے۔

این ڈی ایم اے اور پی ڈی ایم اے کو جدید آلات اور ٹیکنالوجی سے لیس کیا جائے اور ان کے عملے کی تربیت کی جائے۔ سموگ کی روک تھام کے لیے فیکٹریوں، بھٹوں اور گاڑیوں کی مانیٹرنگ کا مؤثر نظام قائم کیا جائے۔

اسکولوں اور کالجوں میں ماحولیاتی تعلیم کو نصاب کا مستقل حصہ بنایا جائے تاکہ نئی نسل کو آغاز سے ہی اس مسئلے کی سنگینی سے آگاہی حاصل ہو۔

موسمیاتی تبدیلی اب صرف قدرتی تبدیلی نہیں بلکہ انسانی کوتاہیوں کا نتیجہ ہے۔ ہماری ترقیاتی ترجیحات میں ماحولیاتی تحفظ کو مسلسل نظر انداز کیا جا رہا ہے۔

جب تک حکومت، ادارے اور عوام مل کر اس مسئلے کو سنجیدگی سے نہ لیں گے، ہر سال مون سون اور سردیوں کی سموگ پاکستان میں انسانی المیے کو جنم دیتی رہے گی۔ ہمیں صرف بیانات اور اعلانات سے آگے بڑھ کر عملی اقدامات کرنا ہوں گے، ورنہ آنے والی نسلیں ہمیں معاف نہیں کریں گی۔

ماحولیاتی تبدیلی ایک عالمی مسئلہ ہے، مگر اس کے حل کے لیے ہر ملک اور ہر فرد کا کردار لازم ہے، تاکہ ہم آنے والی نسلوں کے لیے ایک محفوظ اور پائیدار ماحول فراہم کر سکیں۔