بھارتی اداکارہ سومیا ستھیاناراینا عرف سوندریا کی حادثاتی موت کو سالوں بعد قتل قرار دیتے ہوئے معروف اداکار پر سنگین الزام لگادیے گئے۔
2004 میں ایک ہوائی حادثے میں موت کے گھاٹ اترنے والی اداکارہ سوندریا کی موت پر نیا تنازع اُٹھ کھڑا ہوا ہے جس کے مطابق اداکارہ کی موت حدثاتی نہیں تھی بلکہ انکا قتل کیا گیا تھا۔
سوندریا نے 1999 میں امیتابھ بچن کی فلم ’سوریاوانشم‘ میں ’رادھا سنگھ‘ کا مشہور کردار ادا کیا تھا۔
فلم اتار چڑھاؤ سے بھرپور تھی لیکن اس فلم میں انکا کردار انہیں بھارتی فلم انڈسٹری میں نمایاں مقام دلوا گیا لیکن کس کو معلوم تھا کہ 5 سال بعد یہ حسین اداکارہ دنیا چھوڑ جائے گی۔
این ڈی ٹی وی کی رپورٹ کے مطابق تلگو کے معروف اداکار موہن بابو کے خلاف تلنگانہ کے کھمم ضلع میں شکایت درج کرائی گئی ہے جس میں الزام عائد کیا گیا ہے کہسوندریا کی موت حادثہ نہیں تھی بلکہ انکی موت ایک جائیداد کے تنازعے کا شاخسانہ تھا۔
یہ شکایت سماجی کارکن چٹی مللو کی طرف سے کی گئی ہے جس میں کہا گیا ہے کہ موہن بابو نے سوندریا اور ان کے بھائی پر شمس آباد میں چھ ایکڑ کی پراپرٹی فروخت کرنے کا دباؤ ڈالا، جب انہوں نے انکار کیا، تو دونوں اداکاروں کے درمیان کشیدگی بڑھ گئی، سوندریا کی موت کے بعد، موہن بابو پر الزام ہے کہ انہوں نے اس زمین پر قبضہ کر لیا تھا۔
یاد رہے کہ سوندریا 17 اپریل 2004 کو سیاسی پروگرام کے لیے کریم نگر جا رہی تھیں کہ دورانِ سفر ہوائی حادثے میں ہلاک ہو گئی تھیں۔
وہ 31 سال کی تھیں اور کہا جاتا ہے کہ وہ اس وقت حاملہ تھیں اور ان کی لاش کبھی حادثے کی جگہ سے بازیاب نہیں ہو سکی۔
سماجی کارکن نے حکام سے درخواست کی ہے کہ موہن بابو کے پراپرٹی پر قبضے میں کردار کی تحقیقات کی جائے اور حکومت سے مطالبہ کیا ہے کہ وہ اس متنازع جائیداد کو ضبط کرے۔
انہوں نے پولیس تحفظ کی بھی درخواست کی ہے کیونکہ ان کے مطابق انہیں دھمکیاں موصول ہوئی ہیں۔
شکایت میں گزشتہ سال خبروں کی زینت بننے والے جائیداد تنازعے کا بھی ذکر کیا گیا ہے جو موہن بابو اور ان کے بیٹے منچو منوج کے درمیان تھا۔
اب تک ایف آئی آر درج نہیں کی گئی ہے اور موہن بابو نے ان الزامات پر کوئی جواب نہیں دیا ہے اور حکام نے بھی ابھی تک اس معاملے پر کوئی تبصرہ نہیں کیا۔