امریکی سفارت خانے نے بلوچستان میں ہونے والے جعفر ایکسپریس ٹرین پرحملے کی مذمت کرتے ہوئے بی ایل اے کو عالمی دہشت گرد گروپ قراردیا اور بیان میں کہا کہ مشکل وقت میں پاکستان کے ساتھ کھڑے ہیں۔
امریکی سفارت خانے کی جانب سے جاری بیان میں کہا گیا کہ جعفر ایکسپریس کے مسافروں کو یرغمال بنانے کی شدید مذمت کرتے ہیں، سفارت خانے نے بیان میں کہا کہ اس حملے کی ذمے داری بی ایل اے نے قبول کی جسے امریکا نے ایک عالمی دہشت گرد گروپ قرار دیا ہے۔
امریکی سفارت خانہ نے مذمتی بیان میں کہا کہ ہم متاثرین سے گہری ہمدردی اور تعزیت کا اظہار کرتے ہیں، پاکستانی عموام کو تشدد اور خوف سے آزاد زندگی گزارنے کا حق حاصل ہے۔
امریکی سفارت خانہ کا یہ بھی کہنا ہے کہ ہم اس مشکل وقت میں پاکستان کے ساتھ کھڑے ہیں۔ امریکہ پاکستان کا مضبوط شراکت دار رہے گا۔
دوسری طرف چین نے بھی بلوچستان میں جعفر ایکسپریس پر دہشت گرد حملے کی مذمت کرتے ہوئے دہشت گردی کے خلاف جنگ میں پاکستان کی حمایت جاری رکھنے کا اعلان کیا ہے۔
واضح رہے کہ سیکیورٹی ذرائع کے مطابق جعفرایکسپریس پرحملہ کرنے والے تمام دہشت گردوں کو ہلاک کر دیا گیا ہے، تمام یرغمالیوں کو بازیاب کرا لیا گیا۔
سیکیورٹی فورسز کا کہنا ہے کہ کچھ شہید مسافروں کی تعداد کا تعین کیا جا رہا ہے، آپریشن انتہائی احتیاط اور مہارت سے کیا گیا، مسافروں کوانسانی شیلڈ کے طورپراستعمال کیا جا رہا تھا۔
سیکیورٹی ذرائع نے بتایا کہ پہلے 190 مسافروں کو بازیاب کروایا جا چکا ہے، آپریشن انتہائی اختیاط اور مہارت کا مظاہرہ کیا گیا، معصوم جانیں بچائی گئیں، کچھ شہید مسافروں کی تعداد کا تعیُّن کیا جا رہا ہے، تمام دہشت گردوں کو ہلاک کیا گیا ہے۔