وزیراعظم شہبازشریف تقریر کے دوران گردشی قرضہ بتاتے ہوئے چوک گئے، ٹوکنے پر کہا اگر انہوں نے فگر ٹھیک نہیں بتائی تو صحیح بتا دیں۔ وزیراعظم کی بات پرشرکا کھلکھلا اٹھے اورخود بھی مسکرا دیے۔
اسلام آباد میں عالمی مالیاتی فنڈ (آئی ایم ایف) سے ٹیرف کا فرق کم کرنے کی منظوری ملنے کے بعد وزیراعظم شہباز شریف اپنے خطاب میں بجلی کی قیمتوں میں کمی کا اعلان کرنے کے دوران گردشی قرضہ بتاتے ہوئے چوک گئے۔
تقریر کے دوران ٹوکنے پر وزیراعظم شہباز شریف نے کہا کہ اگر انہوں نے فگر ٹھیک نہیں بتائی تو صحیح بتا دیں۔ چھوٹی موٹی غلطی تو ہو جاتی ہے، انسان خطا کا پتلا ہے۔
وزیراعظم شہباز شریف کی اس بات پرشرکا کھلکھلا اٹھے اور خود بھی مسکرا دیے۔
واضح رہے کہ وزیراعظم شہباز شریف نے بجلی کی قیمتوں میں کمی کا اعلان کرتے ہوئے کہا کہ عوام کو ریلیف حکومت کی اولین ترجیح ہے۔
انھوں نے کہا کہ پاکستان کی معاشی ترقی کے حوالے سے آپ کو خوشخبری سنانے آیا ہوں اور الحمدللہ وہ وعدہ پورا ہوا جو مسلم لیگ ن کے قائد میاں محمد نواز شریف نے اپنے منشور میں وعدہ کیا تھا۔
وزیراعظم نے اپنے خطاب میں کہا کہ میں کھلے دل کے ساتھ اس حقیقت کا اعتراف کرتا ہوں کہ اس سارے عمل میں آرمی چیف جنرل سید محمد عاصم منیر اور ان کے رفقائے کار کا مجھے اور میری ٹیم کو بھرپور تعاون حاصل رہا اور کلیدی کردار رہا۔
وزیراعظم شہباز شریف نے اپنے خطاب کے دوران پی ٹی آئی کا نام لیے بغیر بھی تنقید کی جس میں انھوں نے کہا کہ مخصوص ٹولا ملک کو دیوالیہ کرنے کا خواہش مند تھا، اسی ٹولے نے آئی ایم ایف سے معاہدہ توڑا، مخصوص ٹولے نے اپنی سیاست پر ریاست کو قربان کر دیا۔
تحریک انصاف کا نام لیے بغیر انھوں نے کہا کہ پاکستان اب ڈیفالٹ ہوا تو ہوا، مخصوص ٹولہ اس مقصد کے لیے ہر حد پار کر گیا تھا، آئی ایم ایف سے کیے گئے معاہدے کو خود توڑا، آئی ایم ایف سے تعلقات بحال کیے جا رہے ہیں، مسائل کے حل کے لیے بڑی سرجری کرنا ہوگی، درست اور کڑے فیصلوں کی ضرورت ہے۔