محکمہ موسمیات نے پیش گوئی کی ہے کہ کراچی میں آج سے سورج قہر ڈھائے گا، اور درجہ حرارت 41 ڈگری سینٹی گریڈ تک جا سکتا ہے۔ شہر میں 23 اپریل تک ہیٹ ویو کی صورتحال برقرار رہنے کا امکان ظاہر کیا گیا ہے۔
محکمہ موسمیات کے مطابق، آج سے درجہ حرارت میں 4 سے 6 ڈگری سینٹی گریڈ کا اضافہ متوقع ہے، جبکہ سمندری ہوائیں بند رہیں گی، جس کے باعث موسم شدید گرم اور خشک ہو جائے گا۔ رات کے وقت بھی گرمی کا اثر برقرار رہنے کی توقع ہے۔
اس وقت شہر کا موجودہ درجہ حرارت 33 ڈگری سینٹی گریڈ ریکارڈ کیا گیا ہے، جبکہ زیادہ سے زیادہ درجہ حرارت 41 ڈگری تک جانے کی پیش گوئی کی گئی ہے۔ ہوا میں نمی کا تناسب 40 سے 50 فیصد کے درمیان رہنے کا امکان ہے اور شمال مشرقی سمت سے ہوائیں 7 کلومیٹر فی گھنٹہ کی رفتار سے چل رہی ہیں۔
کراچی میں گرمی کی شدت برقرار، تیز دھوپ اور ہواؤں کا سلسلہ جاری
دوسری جانب، فضائی آلودگی کے حوالے سے کراچی دنیا کے آلودہ ترین شہروں میں پہلے نمبر پر آ گیا ہے، جس کی تصدیق اے کیو آئی (ایئر کوالٹی انڈیکس) کی رپورٹ سے ہوئی ہے۔
محکمہ موسمیات نے ہیٹ ویو الرٹ جاری کرتے ہوئے شہریوں کو احتیاطی تدابیر اختیار کرنے کا مشورہ دیا ہے۔ عوام سے کہا گیا ہے کہ وہ غیر ضروری طور پر باہر نکلنے سے گریز کریں، پانی کا زیادہ استعمال کریں، اور دھوپ میں نکلتے وقت حفاظتی اقدامات لازمی اپنائیں۔