نئے صوبوں کی تشکیل کے معاملے پر حکومت کا مؤقف واضح ہے، عوامی رائے لی جانی چاہیے: عطا تارڑ

وفاقی وزیر اطلاعات عطا اللہ تارڑ نے کہا ہے کہ نئے صوبوں کی تشکیل کے معاملے پر حکومت کا مؤقف واضح ہے اور اس حوالے سے عوامی رائے لی جانی چاہیے، اگر عوام کی رائے صوبوں کے قیام کے حق میں ہو تو نئے صوبے بنا دیے جائیں۔

الیکشن کمیشن کے باہر میڈیا سے گفتگو کرتے ہوئے عطا اللہ تارڑ نے بتایا کہ گزشتہ روز صدر مملکت آصف علی زرداری سے وزیراعظم شہباز شریف کی ملاقات ہوئی، جس میں معاملات کو بات چیت اور افہام و تفہیم کے ذریعے آگے بڑھانے پر اتفاق کیا گیا۔

وفاقی وزیر اطلاعات کا کہنا تھا کہ نئے صوبوں کی تشکیل کے معاملے پر حکومت کا مؤقف بڑا واضح ہے۔ اس معاملے میں عوام کی رائے کو اہمیت دی جانی چاہیے اور فیصلہ عوامی خواہشات کے مطابق ہونا چاہیے۔

عطا تارڑ نے کہا کہ اگر عوامی رائے یہ سامنے آتی ہے کہ ملک میں نئے صوبے بننے چاہئیں تو نئے صوبے بنا دیے جائیں۔

انہوں نے اس بات پر زور دیا کہ صوبوں کی تشکیل کے معاملے پر عوامی رائے کو بنیادی اہمیت حاصل ہونی چاہیے۔

واضح رہے کہ گزشتہ شب صدر مملکت آصف علی زرداری اور وزیراعظم شہباز شریف کے درمیان ملاقات میں ملک کی موجودہ سیاسی صورتحال اور مشرق وسطیٰ کے حالات کا تفصیلی جائزہ لیا گیا۔

ایوانِ صدر کے سوشل میڈیا پلیٹ فارم ’ایکس‘ پر جاری بیان میں کہا گیا تھا کہ وزیراعظم شہباز شریف اور صدر مملکت آصف علی زرداری کے درمیان ملاقات ہوئی، جس میں ملک کی موجودہ سیاسی صورتحال اور مشرق وسطیٰ کے حالات پر تفصیلی تبادلہ خیال کیا گیا۔

ملاقات میں اس بات پر اتفاق کیا گیا کہ تمام معاملات بات چیت کے ذریعے حل کیے جائیں گے۔ اس مقصد کے لیے تمام امور پر مل بیٹھ کر مشاورت کرنے اور باہمی اتفاق رائے سے حل نکالنے کا فیصلہ کیا گیا۔

ملاقات کے دوران سابقہ آئینی ترامیم کا بھی ذکر کیا گیا۔ اس موقع پر کہا گیا کہ یہ ترامیم تمام اتحادی جماعتوں کی باہمی مشاورت سے کی گئی تھیں۔

اُدھر ایوان صدر میں پاکستان پیپلزپارٹی کا بھی اہم اجلاس منعقد ہوا تھا، جس میں ملک کی مجموعی سیاسی صورت حال، حکومت کے ساتھ قانون سازی کے مختلف امور اور بالخصوص نئے صوبوں کے قیام پر جاری بحث سمیت اہم سیاسی معاملات پر تبادلہ خیال کیا گیا تھا۔

اجلاس میں صدر مملکت آصف علی زرداری، چیئرمین پیپلزپارٹی بلاول بھٹو زرداری اور ڈاکٹر فریال تالپور نے شرکت کی تھی جب کہ وفاقی وزیر داخلہ محسن نقوی، وزیراعلیٰ سندھ سید مراد علی شاہ اور سہیل انور سیال بھی اجلاس میں شریک ہوئے تھے۔

ذرائع نے بتایا تھا کہ اجلاس میں ملک کی مجموعی سیاسی صورت حال، بالخصوص متنازع امور پر تفصیلی تبادلہ خیال کیا گیا تھا جب کہ حکومت اور پیپلزپارٹی کے درمیان قانون سازی کے مختلف معاملات پر ہونے والی بات چیت کا بھی جائزہ لیا گیا۔

ذرائع کا مزید کہنا تھا کہ اجلاس میں نئے صوبوں کے قیام سے متعلق جاری بحث بھی زیر غور آئی اور اس معاملے پر شرکا کے درمیان گفتگو ہوئی۔

یہ ملاقات ایسے وقت میں ہوئی ہے جب وزیر داخلہ محسن نقوی نے ملک میں نئے صوبے بنانے کے لیے ریفرنڈم کی بات کی تھی، جس پر پاکستان پیپلز پارٹی کے چیئرمین بلاول بھٹو نے ردِ عمل دیا تھا۔

Related posts