پاکستان سپر لیگ (پی ایس ایل) سیزن 10 کا مجوزہ شیڈول تیار کرلیا گیا، چیرمین پی سی بی محسن نقوی کی منظوری کے بعد شیڈول کا جلد اعلان متوقع ہے۔
ذرائع کے مطابق پاکستان سپر لیگ 10 کو دوبارہ شروع کرنے کی تیاری کرلی گئی، ایونٹ کے بقیہ 8 میچوں کا مجوزہ شیڈول تیار کرلیا گیا۔
ایونٹ کے باقی میچز 17 سے 25 مئی تک لاہور اور راولپنڈی میں کھیلے جائیں گے جبکہ چیئرمین پی سی بی محسن نقوی کی منظوری کے بعد شیڈول کا حتمی اعلان کیا جائے گا۔
ذرائع کے مطابق پاکستان سپر لیگ کے دسویں ایڈیشن کے بقیہ میچز کے لیے تمام فرنچائزز اپنے غیر ملکی کھلاڑیوں سے رابطے میں ہیں اور متعدد کھلاڑیوں نے واپس آنے کی حامی بھی بھرلی ہے۔
ذرائع کے مطابق فرنچائزز کو غیرملکی کھلاڑی دستیاب نہ ہونے کی صورت میں صرف قومی کھلاڑیوں کے ساتھ ہی لیگ کو مکمل کیا جائے گا۔
ذرائع نے مزید بتایا کہ پی ایس ایل 10 کے بقیہ میچز سے پی ایس ایل کی وجہ سے پاک بنگلادیش ٹی 20 سیریز کے شیڈول میں بھی تبدیلی متوقع ہے۔
واضح رہے کہ پاکستان اور بنگلہ دیش کی ٹیموں کے درمیان 5 میچز پر مشتمل ٹی20 سیریز کا انعقاد لاہور اور فیصل آباد کے اسٹیڈیمز میں ہوگا۔
ذرائع نے بتایا ہے کہ پاکستان اور بنگلہ دیش سیریز کے لیے آنے والی براڈ کاسٹنگ ٹیم ہی پی ایس ایل 10 کے بقیہ میچز کی براڈ کاسٹنگ کرے گی۔
واضح رہے کہ پاکستان کرکٹ بورڈ نے پاک بھارت جنگ کے باعث پی ایس ایل غیر معینہ مدت کے لیے ملتوی کردیا تھا۔
پی سی بی کی جانب سے جاری بیان میں کہا گیا تھا کہ پی ایس ایل کے باقی 8 میچز ملتوی کرنے کا اعلان کرتے ہوئے کہا تھا کہ کرکٹ خوشی اور اتحاد کا ذریعہ ہے، تاہم اس وقت ایک وقفہ لینا چاہیے جب ملک ایسی سنگین صورتحال کا سامنا کر رہا ہو۔