کوئٹہ میں سریاب روڈ پر بلوچستان یونیورسٹی کے قریب پاکستان پیپلز پارٹی کے ایم پی اے علی مدد جتک کی ریلی پر نامعلوم شرپسندوں نے حملہ کردیا جبکہ ریلی پر فائرنگ کے علاوہ دستی بم پھینکے گئے، دھماکے میں ایک شخص جاں بحق اور 10 افراد زخمی ہوگئے، دھماکے میں ایم پی اے علی مدد جتک محفوظ رہے۔
پولیس کے مطابق بدھ کو پاکستان پیپلز پارٹی کے رکن بلوچستان اسمبلی علی مدد جتک کی قیادت میں سریاب کسٹم سے ریلی نکالی گئی جو شہر کی طرف آرہی تھی کہ بلوچستان یونیورسٹی کے قریب نامعلوم مُسلح شرپسندوں نے منیر مینگل روڈ سے ریلی پر دستی بم پھینکا اور فائرنگ کی۔
دستی بم پھٹنے سے رکشہ سواروں سمیت 11 افراد زخمی ہوگئے، زخمیوں کو فوری طور پر سول اسپتال اور بولان میڈیکل کمپلیکس منتقل کیا گیا جہاں سول اسپتال ٹراما سنٹر میں ایک زخمی محبوب علی زخموں کی تاب نہ لاتے ہوئے دم توڑ گیا۔
دستی بم حملے میں ایک گاڑی اور ایک رکشہ کو جزوی نقصان پہنچا جبکہ دھماکے میں ایم پی اے علی مدد جتک محفوظ رہے۔
پولیس اور دیگر قانون نافذ کرنے والے اداروں کی بھاری نفری موقع پر پہنچ گئی اور پورے علاقے کو گھیرے میں لے کر موقع سے شواہد اکھٹے کیے۔
سی ٹی ڈی اور سریاب پولیس اس سلسلے میں مزید تحقیقات کر رہی ہیں جبکہ وزیر اعلیٰ بلوچستان میر سرفراز بگٹی اور ترجمان حکومت بلوچستان شاید رند نے واقعہ کی شدید الفاظ میں مذمت کی۔