وزیراعلیٰ پنجاب مریم نواز اور اسپیکر قومی اسمبلی سردار ایاز صادق نے وزیراعظم شہبازشریف کی جانب سے بجلی کی قیمتوں میں تاریخی کمی کے اعلان پرخراجِ تحسین پیش کیا ہے۔
اسپیکرقومی اسمبلی سردار ایاز صادق نے نے اپنے بیان میں بجلی کی قیمتوں میں بڑی کمی کا خیر مقدم کرتے ہوئے کہا کہ یہ وزیراعظم اور ان کی ٹیم کا ایک تاریخی عوامی فیصلہ ہے۔ فیصلے سے صارفین کو بلا امتیاز فائدہ پہنچے گا۔
اسپیکر قومی اسمبلی نے کہا کہ ملک کو معاشی بھنور سے نکالنے کے بعد ریلیف تاریخی اقدام ہے، وزیراعظم کے فیصلے سے ملک میں اب معاشی سرگرمیوں میں مزید تیزی آئے گی۔
سردار ایاز صادق نے کہا کہ ریلیف وزیراعظم کے عوام سے کیے گئے وعدوں کی تکمیل ہے، بجلی کی قیمتوں میں کمی سے برآمدات میں اضافہ اور شرح نمو بڑھے گی۔
مریم نوازکا بجلی کی قیمتوں میں تاریخی کمی پرخراجِ تحسین
وزیراعلیٰ پنجاب مریم نواز نے بھی بجلی کی قیمتوں میں تاریخی کمی پرخراجِ تحسین پیش کرتے ہوئے کہا کہ پنجاب حکومت وزیراعظم کے فیصلے کا خیرمقدم کرتی ہے، نواز شریف نے اقتدار میں آ کر ملک کو بحران سے نکالا۔
مریم نواز نے اپنے پیغام میں کہا کہ نوازشریف نے عوام کو حقیقی ریلیف دیا، بجلی کے نرخوں میں کمی عید کے موقع پر قوم کیلئے تحفہ ہے، گھریلو صارفین کیلئے 7.41 روپے فی یونٹ بڑی سہولت ہے۔
انھوں نے مزید کہا کہ وزیراعظم نے بجلی کے نرخوں میں نمایاں کمی سے عوام دوستی کا ثبوت دیا۔