راولپنڈی کے تھانہ نیوٹاؤن کے علاقے میں ایک معروف فاسٹ فوڈ چین کی برانچ کے باہر ہنگامہ آرائی کے واقعے میں ملوث 14 ملزمان کو گرفتار کر لیا گیا ہے۔ پولیس کے مطابق، گرفتار افراد میں اعجاز، عمر فاروق، محمد شہباز، شہزاد علی، صدی احمد، ساجد علی، نعمان حسین، اختشام، منیب احمد، انور زیب، اسامہ، شہزاد اعظم اور منیب سلطان شامل ہیں۔
پولیس کے مطابق، 14 اپریل کو صدر کے مصروف علاقے میں واقع نجی ریسٹورنٹ پر نوجوانوں کے ایک گروہ نے اچانک حملہ کیا، روڈ بلاک کیا اور شدید ہنگامہ آرائی کی۔ سوشل میڈیا پر وائرل ویڈیوز میں دیکھا جا سکتا ہے کہ بعض افراد کے بازوؤں پر فلسطینی پرچم بندھا ہوا تھا اور ایک شخص کے ہاتھ میں بیس بال کا ڈنڈا بھی تھا۔ ان افراد نے نہ صرف ریسٹورنٹ میں توڑ پھوڑ کی بلکہ موجود گاہکوں، خصوصاً خواتین کو بھی ہراساں کیا۔
ویڈیوز میں ریسٹورنٹ کی میزیں اور کرسیاں الٹی پڑی دیکھی جا سکتی ہیں جبکہ کئی اشیاء کو نقصان پہنچا۔ واقعے کے فوراً بعد ریسٹورنٹ انتظامیہ نے پولیس ہیلپ لائن 15 پر اطلاع دی، لیکن ملزمان پولیس کے پہنچنے سے قبل ہی فرار ہو گئے۔
ریسٹورنٹس پر حملے خطرناک ہوگئے، شیخوپورہ میں ایک قتل
پولیس نے ویڈیوز کی مدد سے ملزمان کی شناخت کی اور مختلف مقامات پر چھاپے مار کر انہیں گرفتار کیا۔ مقدمے کے متن کے مطابق، ملزمان نے ریسٹورنٹ میں داخل ہونے کی کوشش کی اور عملے کو سنگین نتائج کی دھمکیاں بھی دیں۔
پولیس حکام کا کہنا ہے کہ تمام ملزمان کے خلاف ٹھوس شواہد کی بنیاد پر چالان تیار کر کے انہیں عدالت میں پیش کیا جائے گا۔ ترجمان پولیس کے مطابق، شہر میں قانون کی عملداری کو ہر صورت یقینی بنایا جائے گا اور ایسی حرکات برداشت نہیں کی جائیں گی۔