بھارت کی انڈر 19 کرکٹر کی مبینہ خودکشی، اہلِ خانہ کا ہراسانی کا الزام
بھارت کی انڈر 19 ویمنز کرکٹ ٹیم میں منتخب ہونے والی 17 سالہ کرکٹر نندنی کی مبینہ خودکشی کے واقعے نے ریاست تلنگانہ میں غم و غصے کی لہر دوڑا دی، اہلخانہ نے دو نوجوانوں پر ہراساں کرنے کا الزام عائد کرتے ہوئے انصاف کا مطالبہ کردیا ہے۔
بھارتی میڈیا رپورٹس کے مطابق نندنی کی لاش ریاست تلنگانہ کے ضلع وِکارآباد کے علاقے مدھو کالونی میں ان کی دادی کے گھر سے ملی۔ نندنی کا تعلق ضلع وِکارآباد کے علاقے یالال منڈل کے گاؤں سنگایا پلی سے تھا۔ وہ تعلیم کے ساتھ کرکٹ کی تربیت بھی حاصل کر رہی تھیں اور اپنی دادی کے گھر رہائش پذیر تھیں۔
نندنی کو حال ہی میں بھارتی کرکٹ بورڈ (بی سی سی آئی) کی انڈر 19 ویمنز کرکٹ ٹیم کے لیے منتخب کیا گیا تھا۔ ان کے انتخاب سے نہ صرف اہلخانہ بلکہ علاقے کے لوگوں میں بھی خوشی کی لہر دوڑ گئی تھی اور ان سے مستقبل میں کرکٹ کے میدان میں اچھی کارکردگی کی امیدیں وابستہ تھیں۔
واقعے کے بعد نندنی کے اہلخانہ نے انیل اور کرشنا نامی دو نوجوانوں پر انہیں ہراساں کرنے کا الزام عائد کیا ہے۔ اہلخانہ کے مطابق انیل گزشتہ چند روز سے محبت کے نام پر نندنی کا پیچھا کر رہا تھا اور انہیں تنگ کرتا تھا، جبکہ کرشنا پر اس کا ساتھ دینے کا الزام لگایا گیا ہے۔
رپورٹ کے مطابق نندنی کی موت کی اطلاع ملنے پر پولیس موقع پر پہنچ گئی۔ وِکارآباد کے سرکل انسپکٹر رگھو کے مطابق پولیس کو صبح تقریباً 9 بجے واقعے کی اطلاع ملی، جس کے بعد اہلکاروں نے جائے وقوعہ پر پہنچ کر ابتدائی تحقیقات شروع کیں۔ ابتدائی معائنے میں لڑکی کی موت خودکشی کا واقعہ معلوم ہوئی۔
سرکل انسپکٹر رگھو نے تصدیق کی کہ نندنی کے اہلخانہ نے دو نوجوانوں کی جانب سے ہراساں کیے جانے کی شکایت کی ہے۔ پولیس نے تحقیقات کے سلسلے میں نندنی کا موبائل فون بھی قبضے میں لے لیا ہے، جسے فرانزک جانچ کے لیے بھیجا گیا ہے۔
رگھو نے بتایا کہ پولیس نندنی کے انسٹاگرام، فیس بک اور واٹس ایپ اکاؤنٹس کا بھی جائزہ لے گی تاکہ معلوم کیا جا سکے کہ آیا انہیں سوشل میڈیا کے ذریعے کوئی شخص ہراساں یا پریشان تو نہیں کر رہا تھا۔
ان کا کہنا تھا کہ ’’ہم ان کے سوشل میڈیا اکاؤنٹس کا جائزہ لیں گے تاکہ کسی بھی قسم کی ہراسانی یا پریشانی کے شواہد سامنے آسکیں۔ تحقیقات کے نتائج کی بنیاد پر ذمہ دار افراد کے خلاف مناسب کارروائی کی جائے گی۔‘‘
دوسری جانب نندنی کی موت کے خلاف ان کے اہلخانہ اور رشتہ داروں نے سڑک پر احتجاج بھی کیا اور الزام عائد کیے گئے دونوں نوجوانوں کی فوری گرفتاری کا مطالبہ کیا۔ مظاہرین نے واقعے میں ملوث افراد کے خلاف سخت کارروائی کرنے اور انہیں انصاف فراہم کرنے کی اپیل کی ہے۔
نندنی کے والد کی شکایت پر پولیس نے واقعے کا مقدمہ درج کر لیا ہے۔ جمعے کی صبح ان کی لاش کا پوسٹ مارٹم کیا گیا، جس کے بعد میت اہلخانہ کے حوالے کر دی گئی۔
سرکل انسپکٹر رگھو نے والدین پر زور دیا کہ وہ اپنے بچوں کے موبائل فون کے استعمال اور سوشل میڈیا پر ان کی سرگرمیوں سے باخبر رہیں۔ ان کا کہنا تھا کہ مشکلات کا سامنا کرنے والے بچوں کو تنہا چھوڑنے کے بجائے انہیں جذباتی سہارا اور حوصلہ دینا چاہیے تاکہ وہ پریشانی اور ذہنی دباؤ کا شکار نہ ہوں۔