بگ باس جیتنے کے بعد منور فاروقی کی ذہنی حالت کیسے خراب ہوئی؟ ہوشرُبا انکشاف

بھارت کے معروف اسٹینڈ اپ کامیڈین اور رئیلٹی شو بگ باس 17 کے فاتح منور فاروقی نے انکشاف کیا ہے کہ شو جیتنے کے بعد ملنے والی بے پناہ شہرت اور دولت کے باوجود وہ ذہنی طور پر شدید پریشانی کا شکار ہو گئے تھے اور تین سے چار دن تک خود کو ایک کمرے میں بند کر کے نماز پڑھتے ہوئے روتے رہے تھے۔

حال ہی میں ٹینس اسٹار ثانیہ مرزا کے پوڈ کاسٹ میں گفتگو کرتے ہوئے منور فاروقی نے اپنی زندگی کے کٹھن دور کی یادیں تازہ کیں۔

انہوں نے بتایا کہ فروری سے اپریل 2024 کا عرصہ ان کے لیے انتہائی تکلیف دہ تھا کیونکہ شو جیتنے کے بعد انہیں کام کے بے شمار مواقع اور مالی استحکام تو مل گیا تھا، لیکن ان کی ذاتی زندگی پر ہونے والی مسلسل بحث اور عوامی توجہ ان کی ذہنی صحت کو متاثر کر رہی تھی۔

منور نے بتایا کہ شو جیتنے کے ڈھائی ماہ کے اندر ہی انہیں احساس ہونے لگا کہ جس قسم کی توجہ انہیں مل رہی ہے وہ نہ تو ان کے لیے اچھی ہے اور نہ ہی ان کے بیٹے میکائیل کے مستقبل کے لیے بہتر ہے۔ ان کا کہنا تھا کہ ان پر بہنوں اور خاندان کی بڑی ذمہ داریاں تھیں، جس کی وجہ سے وہ شدید دباؤ میں آ گئے تھے۔

اپنی ذہنی کیفیت بیان کرتے ہوئے کامیڈین نے کہا کہ باہر پوری دنیا ان کی ایک جھلک دیکھنے کے لیے منتظر تھی اور بظاہر ان کی زندگی میں سب کچھ اچھا چل رہا تھا لیکن انہوں نے خود کو تین چار دن کے لیے ایک کمرے میں بند کر لیا تھا۔

منور کے مطابق وہ نماز پڑھتے ہوئے رویا کرتے تھے اور اللہ سے زندگی میں سکون اور ٹھہراؤ کی دعا مانگتے تھے اور یہی وہ لمحہ تھا جب انہیں احساس ہوا کہ انہیں اب شادی کر لینی چاہیے۔

منور نے بتایا کہ جب وہ ان دنوں کے بعد باہر نکلے تو انہیں اپنی زندگی سے نفرت محسوس ہونے لگی۔ انہیں اندازہ ہوا کہ وہ جس طرزِ زندگی سے گزر رہے ہیں، اس سے خوش نہیں ہیں اور شاید یہی احساس انہیں شادی کرنے کے فیصلے کی طرف لے جا رہا تھا۔

واضح رہے کہ بگ باس 17 کے دوران منور فاروقی کی ذاتی زندگی خاصی توجہ کا مرکز رہی تھی۔ شو میں وائلڈ کارڈ انٹری کے ذریعے آنے والی اداکارہ عائشہ خان نے ان پر الزام عائد کیا تھا کہ انہوں نے انہیں اور اپنی سابق گرل فرینڈ نازیلا سیتاشی کو دھوکے میں رکھا۔

عائشہ خان کے ان الزامات کے بعد شو میں منور کو شدید تنقید کا سامنا کرنا پڑا اور ان کی نجی زندگی سے متعلق معاملات مسلسل زیر بحث رہے۔ اس دوران میزبان سلمان خان نے بھی ان کی حمایت میں بات کی تھی۔

پوڈ کاسٹ میں منور نے اپنی دوسری اہلیہ مہ جبین کوٹ والا سے ملاقات اور اچانک شادی کی دلچسپ کہانی بھی سنائی۔ انہوں نے بتایا کہ مہ جبین ان کے ایک مشترکہ دوست کی کزن ہیں جن سے ان کی پہلی ملاقات شادی سے ڈیڑھ سال قبل ہوئی تھی، تاہم رمضان کے بعد عید پر مہ جبین کی جانب سے تحفہ بھیجنے پر دونوں کے درمیان دوبارہ رابطہ ہوا۔

تین چار دن کی گفتگو کے بعد منور کو معلوم ہوا کہ مہ جبین کی بھی علیحدگی ہو چکی ہے اور ان کی ایک بیٹی ہے۔ ایک ہفتے کی بات چیت کے بعد منور نے انہیں ملاقات کے لیے بلایا اور پہلی ہی ملاقات میں شادی کی پیشکش کر دی۔

منور کے مطابق مہ جبین اس اچانک پیشکش پر حیران رہ گئیں اور گھر والوں سے مشورے اور ان کے بارے میں جاننے کے لیے وقت مانگا۔ ایک ہفتے کی چھان بین اور منور کے منانے کے بعد دونوں نے محض ایک ماہ کے اندر مئی 2024 میں شادی کر لی۔

منور فاروقی نے جذباتی انداز میں کہا کہ دوسری شادی کے ساتھ ہی ان کے گھر ایک بیٹی کی آمد ہوئی جس سے انہیں بے حد لگاؤ ہے اور وہ بہت پیاری ہے۔

اب وہ اپنی اہلیہ مہ جبین، بیٹے میکائیل اور مئی 2026 میں پیدا ہونے والی اپنی نومولود بیٹی بریرہ کے ساتھ ایک خوشگوار اور پرسکون زندگی گزار رہے ہیں۔